پاکستان کی سینیئر اور معروف اداکارہ بشریٰ انصاری نے پاکستانی ڈراموں کے عربی زبان میں ترجمے کو ڈراما انڈسٹری کے لیے خوش آئند قرار دیا ہے۔
بشریٰ انصاری نے پاکستانی ڈراموں کے عربی زبان میں ترجمے کو ڈراما انڈسٹری کے لیے خوش آئند قرار دیتے ہوئے کہا کہ پہلے اس جانب توجہ کم تھی لیکن اب اس کا رجحان بڑھتا جا رہا ہے۔
سینیئر اداکارہ نے کہا کہ جب انگریزی اور ترکش سمیت دیگر زبانوں کے ڈرامے اردو ڈبنگ میں دیکھے جا رہے ہیں توپاکستانی کانٹینٹ بھی دیگر زبانوں میں ہونا چاہیے۔
انہوں نے کہا کہ ’پاکستان کی ڈراما انڈسٹری میں اچھے، برے اور درمیانے طرح کے سب کام چل رہے ہیں، اس میں سے کوئی کوئی ڈراما اسٹینڈ اپ کر جاتا ہے، کسی بھی ڈرامے یا پروجیکٹ کی کامیابی کے بارے میں کوئی کچھ نہیں کہہ سکتا۔ ہم بس کام کیے جاتے ہیں۔
بشریٰ انصاری نے کہا کہ پاکستان کے کام کو دنیا بھر میں پسند کیا جاتا ہے۔ ہم پاکستان میں ون مین اسٹینڈ اپ شو کرنے جا رہے ہیں اور ہمارا پلان ہے کہ پاکستان میں ہونے والے سٹینڈ اپ کامیڈی شو کو خلیجی ممالک سمیت دیگر ملکوں میں بھی لے کر جائیں کیونکہ دنیا بھر میں اسے بہت پسند کیا جاتا ہے۔
واضح رہے کہ کئی مشہور پاکستانی ڈراموں کو عربی زبان میں ڈب کرکے سعودیہ کے مقامی ٹی وی چینلز پر نشر کیا جا چکا ہے۔
