لاہور : لاہور ہائی کورٹ نے چیئرمین پی ٹی آئی عمران خان کی اہلیہ بشریٰ بی بی کو2:15 بجے تک پیش ہونے کی مہلت دے دی۔
تفصیلات کے مطابق لاہور ہائی کورٹ میں بشریٰ بی بی کی حفاظتی ضمانت کی درخواست پرسماعت ہوئی، جسٹس شہباز رضوی کی سربراہی میں 2رکنی بینچ سماعت نے سماعت کی۔
عدالت نے استفسار کیا درخواست گزار کہاں ہیں؟ ،وکیل بشریٰ بی بی نے بتایا کہ معذرت خواہ ہوں کچھ دیرمیں پیش ہوجائیں گے، جس پر
جسٹس شہباز رضوی نے کہا کہ عدالتوں کو انتظار کرانا مناسب نہیں ہے۔
عدالت نے بشریٰ بی بی کو2:15 بجے تک پیش ہونے کی مہلت دے دی اور کہا 2:15سے 2:16 ہوئے تو درخواست مسترد کردی جائے گی۔
یاد رہے لاہور ہائیکورٹ میں پی ٹی آئی چیئرمین عمران خان کی اہلیہ بشریٰ بی بی نے القادرٹرسٹ کیس میں حفاظتی ضمانت دائر کی تھی۔
درخواست میں وفاقی حکومت ،نیب اور دیگر کو فریق بناتے ہوئے موقف اختیار کیا گیا تھا کہ نیب نےالقادرٹرسٹ کیس میں تحقیقات شروع کررکھی ہے، نیب کی جانب سے جاری تحقیقات غیر قانونی ہیں۔
درخواست میں کہا تھا کہ خدشہ ہے نیب کی جانب سے گرفتار کیا جا سکتا ہے، اسلام آباد کی احتساب عدالت سے رجوع کرنا ہے ، استدعا ہے کہ عدالت القادر ٹرسٹ کیس میں حفاظتی ضمانت منظور کرے۔
