بورے والا : پنجاب کے ضلع وہاڑی کے علاقے بورے والا میں بھتہ نہ دینے پر تاجر کو سر عام گولیاں مار کر قتل کر دیا گیا۔
تفصیلات کے مطابق پنجاب کے ضلع وہاڑی کے علاقے بورے والا کے علاقے ماڈل ٹاؤن میں قتل کا واقعہ سامنے آیا، جہاں مبینہ طور پر بھتے نہ دینے پر مقامی تاجر کو گولی مار کر قتل کر دیا گیا۔
پولیس نے بتایا کہ تاجر ملک اکرم کو شہزاد عرف کبابٹ نے بھرے بازار میں گولیاں مار کر قتل کیا اور موقع سے فرار ہونے ہوگیا۔
شہزادعرف کبابٹ نے تاجر ملک اکرم سے بھتہ مانگا تھا ، تاہم پولیس نے ماڈل ٹاؤن تھانے میں قتل کا مقدمہ درج کر لیا ہے۔
اسی طرح کے ایک واقعے میں کراچی کے ایک تاجر کو مبینہ طور پر ایک بین الاقوامی نمبر سے بھتے کی کال موصول ہوئی، جس میں دو کروڑ روپے کا مطالبہ کیا گیا اور انکار کرنے پر دونوں بھائیوں کو قتل کرنے کی دھمکی دی گئی تھی۔
ایک بیان میں تاجر نے دعویٰ کیا تھا کہ 04 دسمبر کی رات موٹر سائیکل پر سوار دو افراد ان کی دکان کے قریب آئے اور اندھا دھند فائرنگ کر دی جس سے ان کا بھائی زخمی ہو گیا۔
پولیس حکام کے مطابق تاجر کراچی کے علاقے کورنگی میں گیس سلنڈر کی دکان چلاتا ہے اور بھتہ نہ دینے پر اسے جان سے مارنے کی متعدد دھمکیاں مل رہی ہیں۔
