کراچی: صوبے میں 25 دن سے جاری لاک ڈاؤن میں کاروبار کی مسلسل بندش سے پریشان شہر قائد کے تاجروں نے گورنر سندھ عمران اسماعیل سے امیدیں باندھ لی ہیں۔
اے آر وائی نیوز کے مطابق گورنر سندھ عمران اسماعیل نے تاجروں کو مذاکرات کے لیے آج طلب کر لیا ہے، ذرایع کا کہنا ہے کہ گورنر سندھ نے تاجروں کو جائز مطالبات حل کرنے کی امید دلائی ہے۔
تاجر تنظیموں نے گزشتہ روز بدھ کو کاروبار کھولنے کا اعلان کیا تھا، کمشنر کراچی افتخار شالوانی کی یقین دہانی پر تاجر تنظیموں نے اعلان کو 2 دن کے لیے مؤخر کر دیا تھا، کمشنر کراچی نے تاجروں کو وزیر اعلی سندھ سے ملاقات کی یقین دہانی کرائی تھی تاہم وزیر اعلیٰ سندھ نے تاجروں کو ابھی تک ملاقات کا وقت نہیں دیا۔
تاجر صوبائی انتظامیہ سے مایوس ہو کر آج گورنر سندھ سے ملاقات کے لیے گورنر ہاؤس جائیں گے، تاجروں نے اپنے مسائل کے حل کے لیے وفاق کی جانب امید لگا لی ہے، اس سلسلے میں کراچی کی مارکیٹوں کی تاجر تنظیموں کا 7 رکنی وفد گورنر سندھ سے آج دوپہر ملاقات کے لیے جائے گا۔
مارکیٹیں بند ہونے سے تاجروں کے دیوالیہ ہونے کا خطرہ سر پر منڈلانے لگا ہے، مارکیٹوں کی مسلسل بندش سے روزانہ اجرت پر کام کرنے والے بھی بے روزگار ہونے لگے ہیں، دکان دار بجلی گیس کے بل اور دکانوں کا کرایہ تک ادا کرنے کی پوزیشن میں نہیں ہیں۔
