کراچی : ضمنی بلدیاتی انتخابات کے حوالے سے جماعت اسلامی اور تحریک انصاف کی قیادت میں رابطہ ہوا ہے، رہنماؤں نے انتخابی نتائج کی چوری روکنے کیلئے مشترکہ حکمت عملی مرتب کرلی۔
اس حوالے سے جماعت اسلامی کراچی کے امیر حافظ نعیم الرحمان اور پی ٹی آئی رہنما آفتاب صدیقی کے درمیان ٹیلیفونک رابطہ ہوا ہے۔
دوران گفتگو دونوں رہنماؤں نے اس بات پر اتفاق کیا کہ اس بار ضمنی بلدیاتی انتخابات کے نتائج چوری نہیں ہونے دیں گے، دونوں جماعتیں اس بات پر متفق ہیں کہ پولنگ کے بعد انتخابی نتائج پر پہرہ دیا جائے گا۔
ذرائع کے مطابق انتخابی نتائج کے حوالے سے دونوں جماعتوں نے مشترکہ حکمت عملی تیار کرلی ہے، جس کے تحت دونوں جماعتوں کے کارکنان دوران پولنگ اور پولنگ کے بعد دھاندلی کو روکنے کیلئے مکمل نگرانی کریں گے۔
مشترکہ حکمت عملی کے تحت کارکنان مشترکہ طور پر انتخابی نتائج پر نظر رکھنے کیلئے آر او دفاتر میں موجود رہیں گے، رہنماؤں نے کہا کہ جنوری میں جس طرح چوری کی کوشش کی گئی اب نہیں کرنے دیں گے۔
