ملتان : پی پی217 میں ضمنی الیکشن کے دوران مبینہ طور پر دھاندلی کا اہم ثبوت سامنے آگیا، شاہ محمود قریشی نے ن لیگ پر ووٹوں کی خریدو فروخت کا الزام عائد کردیا۔
ذرائع کے مطابق سابق وزیر خارجہ شاہ محمود قریشی وہاڑی روڈ پر قائم ایک فیکٹری میں پہنچے، شاہ محمود قریشی نے فیکٹری کے دروازہ کھولنے کیلئے دروازے پر دستک دی۔
اس موقع پر شاہ محمود قریشی کو فیکٹری ملازمین نے گھیر لیا، شاہ محمود قریشی کا دستک دیتے ہوئے کہنا تھا کہ دروازہ کھولو اندر ٹھپے لگائے جارہے ہیں۔
شاہ محمود قریشی نے بتایا کہ ن لیگ ووٹوں کی خریدو فروخت کر رہی ہے، آر او کہاں ہے، کیا یہ اسے نظر نہیں آ رہا؟
انہوں نے کہا کہ وہاڑی روڈ پر فیکٹری میں خواتین کو جمع کرکے ان کے شناختی کارڈ ضبط کئے گئے اور خواتین سے کہا گیا کہ ن لیگ کو ووٹ دے کر آئیں اور شناختی کارڈ واپس لے جائیں۔
شاہ محمود قریشی کا کہنا تھا کہ جب میں اندر جانے لگا تو فیکٹری کا مالک وہاں سے روانہ ہوگیا، میں پہنچا تو فیکٹری کے دروازے بند کردیئے گئے۔
