سیالکوٹ: الیکشن کمیشن آف پاکستان نے کہ کہا ہے کہ پنجاب کے انتخابی حلقے این اے 75 ڈسکہ میں ضمنی الیکشن 18 مارچ کو ہوں گے۔
تفصیلات کے مطابق الیکشن کمیشن نے این اے پچھتر ڈسکہ میں دوبارہ ضمنی انتخاب کی تاریخ دے دی، ڈسٹرکٹ ایجوکیشن اتھارٹی کی جانب سے کہا گیا ہے کہ حلقے میں 21 پولنگ اسٹیشنز پر نیا عملہ کام کرے گا۔
ڈی ای اے کے مطابق 339 پولنگ اسٹیشنز پر 19 فروری والا عملہ کام کرے گا، ڈیوٹی آرڈر کی اطلاع واٹس ایپ کے ذریعے کر دی گئی ہے، پولنگ اسٹیشن نمبر 346 کا پریذائیڈنگ افسر بھی تبدیل کر دیا گیا ہے۔
این اے 75 سے متعلق سپریم کورٹ کا اہم فیصلہ
واضح رہے کہ آج سپریم کورٹ نے سیالکوٹ کے حلقے این اے 75 سے پی ٹی آئی امیدوار علی اسجد ملہی کی جانب سے دائر درخواست کو منظور کرتے ہوئے کل کیس کی سماعت کرنے کا حکم نامہ جاری کر دیا ہے۔
سپریم کورٹ کا 3 رکنی بینچ اس کیس کی سماعت کرے گا، پی ٹی آئی امیدوار نے الیکشن کمیشن کے فیصلے کے خلاف اپیل کی تھی، جس پر رجسٹرار آفس نے فریقین کو نوٹس جاری کر دیے ہیں۔
