کراچی: پرندوں سے جہاز اور ہوائی سفر کو محفوظ بنانے کے لیے سول ایوی ایشن نے اہم فیصلہ کرتے ہوئے جدید خودکار نظام کی تنصیب کے لیے اہم قدم اٹھا لیا۔
تفصیلات کے مطابق سی اے اے نے ملک کے 3 بڑے انٹرنیشنل ایئر پورٹس پر پرندوں سے جہازوں کو بچانے کے لیے جدید خودکار نظام نصب کرنے کا فیصلہ کیا ہے۔
سول ایوی ایشن اتھارٹی نے اس سلسلے میں درخواستیں طلب کر لی ہیں، ترجمان سی اے اے کا کہنا ہے کہ 28 ستمبر کو ٹینڈر کھولے جائیں گے۔
پہلے مرحلے میں لاہور ایئرپورٹ پر یہ جدید خودکار نظام نصب کیا جائے گا، جہاں اس سسٹم کے افادی نتائج کو دیکھنے کے بعد اسلام آباد اور کراچی ایئرپورٹس سے متعلق فیصلہ کیا جائے گا۔
ذرائع کا کہنا ہے کہ کراچی اور لاہور ایئرپورٹ کے اطراف کی آبادیوں میں گندگی کے باعث پرندے ایئرپورٹ کی طرف راغب ہوتے ہیں، اور پرندوں کی تعداد میں اضافہ محفوظ ہوائی سفر کے لیے ایک چیلنج ہے۔
