کراچی: سول ایوی ایشن اتھارٹی (سی اے اے) نے پی آئی اے کے 17 پائلٹس کے لائسنس منسوخ کردئیے۔
اے آر وائی نیوز کی رپورٹ کے مطابق سی اے اے نے قومی ایئرلائن کے 17 پائلٹس کے لائسنس تحقیقات کے بعد منسوخ کردئیے، فرسٹ آفیسر کا لائسنس بھی منسوخ کردیا گیا ہے۔
ذرائع کے مطابق حکومت کی منظوری کے بعد ڈی جی سول ایوی ایشن اتھارٹی نے پائلٹس کے لائسنس منسوخی کے باضابطہ لیٹر جاری کردئیے۔
ترجمان پی آئی اے نے تصدیق کرتے ہوئے کہا کہ 8 کپتانوں کی فہرست پی آئی اے کو موصول ہوگئی ہے جن پائلٹس کے لائسنس منسوخ کیے گئے ان کپتانوں کو ملازمت سے برخاست کردیا جائے گا۔
سول ایوی ایشن ذرائع کا کہنا ہے کہ سی اے اے نے 90 سے زائد پی آئی اے کے کپتانوں کے لائسنس معطل کردئیے ہیں جن کی تحقیقات جاری ہیں۔
ذرائع کا کہنا ہے کہ پی آئی اے کے 48 پائلٹس کے اے پی ٹی ایل لائسنس بغیر شوکاز جاری کیے معطل کردئیے گئے ہیں، معطل ہونے والے پائلٹس کو وضاحت کے لیے دو ہفتے کے اندر جواب داخل کرانے کی مہلت دی گئی ہے۔
پالپا ذرائع کا کہنا ہے کہ کپتانوں کے لائسنس معطل کرنے کے حوالے سے متعدد پائلٹس نے سی اے اے کو جواب جمع کرادئیے ہیں جس پر مزید قانونی مشاورت جاری ہے۔
