کراچی : باچا خان انٹرنیشنل ایئرپورٹ پر سول ایوی ایشن عملے نے فرض شناسی اور دیانتداری کا عملی مظاہرہ کرتے ہوئے زیورات سے بھرا ہوا بیگ ہنگو کے رہائشی کے حوالے کر دیا۔
پشاور ایئرپورٹ پرشارجہ سے غیر ملکی پرواز سے پہنچنے والامسافر اپنا بیگ لاونج میں بھول گیا تھا، سول ایوی ایشن اتھارٹی کے پورٹر قیصر خان کو لاؤنج میں بیگ پڑا ہوا ملا جو مسافر بھول گیا تھا۔
سول ایوی ایشن اتھارٹی کے پورٹر نے بیگ ایئرپورٹ انتظامیہ شفٹ انچارج حمید کے حوالے کیا بیگ کی تلاشی لی گئی تو اس میں قیمتی سامان سمیت زیورات بھی موجود تھے۔
سی اے اے کے شفٹ انچارج حمید نے مسافر کے بیگ میں لگے ہوئے ٹیگ کی مدد سے مسافر کا پتہ چلایا کہ مسافر ہنگو کا رہائشی ہے، سول ایوی ایشن اتھارٹی کے شفٹ انچارج حمیت نے مسافر کے گھر کا جا کر اس کا قیمتی سامان اس کے حوالے کیا۔
مسافر نے اپنا قیمتی سامان ملنے پر سول ایوی ایشن اتھارٹی کے عملے کا شکریہ بھی ادا کیا، اس موقع پر مسافر کا کہنا تھا کہ بیگ گم ہونے پر بہت پریشان تھا، بچی کی شادی کیلئے زیوارات خریدے تھے جو بیگ میں موجود تھے، سول ایوی ایشن اتھارٹی کی جانب سے پورٹر کی فرض شناسی اور ایمانداری پر تعریفی اسناد اوراعزازیہ دینے کا بھی اعلان کیا ہے۔
