لندن: برطانوی کھلاڑیوں نے دعویٰ کیا ہے کہ دورہ پاکستان کی منسوخی کے فیصلے پر ہمیں اندھیرے میں رکھا گیا، اس سے متعلق کوئی علم نہیں تھا۔
انگلش پلیئرز ایسوسی ایشن کے مطابق دورہ پاکستان کی منسوخی میں ہمارا کردار نہیں، اس کے فیصلے پرہمیں اندھیرے میں رکھا گیا، اس حوالے سے ہم سے پہلے کسی نے بات ہی نہیں کی۔
پلئیرز ایسوسی ایشن نے بتایا کہ ہم سے تو یہ بھی نہیں پوچھا گیا کہ کیا آپ پاکستان سفر کریں گے یا نہیں، ہمیں تو دورہ منسوخ کرنے کے بعد بتایا گیا۔
خیال رہے کہ نیوزی لینڈ اور انگلینڈ کی جانب سے دورہ پاکستان کی منسوخی اس وقت دنیا کی توجہ کا مرکز بنی ہوئی ہے، لیجنڈری کھلاڑیوں نے مذکورہ دونوں ممالک کو شدید تنقید کا نشانہ بنایا۔
وسیم اکرم، معین خان اور راشد لطیف کے اہم مشورے!
غیرملکی تجزیہ کاروں نے بھی پاکستان کو کرکٹ کے لیے محفوظ ملک قرار دیا۔ ان کا ماننا ہے کہ ممکنہ طور پر نیوزی لینڈ اور انگلینڈ کی جانب سے یہ اقدام کوئی سیاسی چال ہوسکتی ہے۔
دوسری جانب وزیراعظم عمران خان نے قومی کرکٹرز سے ملاقات کی اور انہیں حوصلہ دیا کہ وہ پریشر نہ لیں، ورلڈ کپ میں اچھی کارکردگی کے لیے توجہ مرکوز رکھیں۔
