کراچی: کینسر کے موذی مرض میں مبتلا پاکستانی ڈرامہ انڈسٹری کی معروف اداکارہ نادیہ جمیل نے جذباتی پیغام جاری کردیا۔
سماجی رابطے اور مائیکروبلاگنگ کی ویب سائٹ ٹویٹر پر اپنے جذباتی اور معنی خیز پیغام میں اداکارہ نے لکھا کہ ’ہم سب کی ہی زندگیاں اختتام پذیر ہوں گی لیکن مجھے یقین ہے کہ کینسر میری زندگی کا اختتام نہیں ہے‘۔
انہوں نے لکھا کہ ’یہ ایک طے شدہ حقیقیت ہے کہ ہم ایک ترتیب سے اپنی زندگی گزارتے ہوئے اختتامی سفر کی جانب گامزن ہیں، ہماری زندگیوں کا سب سے دلچسپ پہلو یہ ہے کہ ہماری زندگی میں آنے والی پریشانیاں اور رکاوٹیں یاد دہانی کرواتی ہیں کہ زندگی ابھی ختم نہیں ہوئی بلکہ اس کا سلسلہ جاری ہے‘۔
مزید پڑھیں: کینسر میں مبتلا اداکارہ نادیہ جمیل کا بچوں کے نام جذباتی خط
انہوں نے لکھا کہ ’میں نے اپنی زندگی کے ممکنہ خدشات سے لڑنے کے لیے صبر سے کام لینے کی کوشش کی اور میں اس میں کامیاب بھی ہوں گی‘۔
#Cancer is not the end of my life. All lives have 2 end some day. Thats the 1 definitive Truth we know about our journey. How we tackle the hurdles is an exciting reminder that its not over yet. I learn a beautiful patience & discover fears that must/will be conquered
InshaAllah pic.twitter.com/dxW12HZ9kH— Nadia Jamil (@NJLahori) June 30, 2020
یاد رہے کہ رواں سال اپریل میں نادیہ جمیل کو بریسٹ کینسر کی تشخیص ہوئی جس کے بعد سے وہ موذی مرض کا علاج کروا رہی ہیں۔
اداکارہ نے کینسر کی تصدیق کرتے ہوئے بتایا تھا کہ ’میرا پہلا اسٹیج ہے اور ٹیومر کا تیسرا گریڈ ہے، خواتین کو باقاعدگی سے خود اپنا معائنہ کروانا ضروری ہے، اگر وہ اندورنی طور پر کوئی غیر معمولی کیفیت محسوس کریں تو فوراً طبیب سے مشورہ لیں‘۔