واشنگٹن: جیسے جیسے 6 جنوری کا دن قریب آتا جا رہا ہے، ویسے ویسے امریکی کیپیٹل پر خوف کی فضا طاری ہو رہی ہے۔
تفصیلات کے مطابق امریکا کی کیپیٹل پولیس نے 6 جنوری کے قریب آنے پر فسادات دوبارہ رونما ہونے کا خدشہ ظاہر کر دیا ہے، جب کانگریس کی عمارت پر سابق صدر ڈونلڈ ٹرمپ کے حامی فسادیوں نے حملہ کر دیا تھا۔
امریکی میڈیا کے مطابق یو ایس کیپٹل پولیس کے ایک افسر اکیلینو گونیل نے گزشتہ سال 6 جنوری کو ہونے والے فسادات کو یاد کرتے ہوئے کہا کہ ایک سال گزر گیا ہے لیکن وہ اب بھی اپنے بائیں بازو کو اوپر اُٹھا نہیں سکتا، جو حملے کے دوران زخمی ہوا تھا۔
گونیل نے کہا کہ بہت سے فسادیوں کو کافی سزا نہیں ہوئی بلکہ وہ میرے صحت یاب ہونے سے پہلے ہی اپنی سزا ختم کر کے جیل سے باہر آ گئے۔
ریٹائرڈ جرنیلوں نے امریکا میں فوجی بغاوت کا خدشہ ظاہر کر دیا
گونیل نے کہا کہ سیاست دانوں کی طرف سے 6 جنوری کے واقعات کو اہمیت نہ دینے سے بھی اسے دکھ پہنچا، امید ہے کہ فسادات کے جاری مقدمات کے نتیجے میں ذمہ داروں کو سخت سزا ملے گی۔
انھوں نے کہا اس سے قطع نظر کہ سیاست دان کیا کہتے ہیں، میں ان لوگوں کے حوالے سے یہ نہیں چاہتا کہ وہ اچھے کی امید رکھیں۔
