کراچی: سوشل میڈیا پر کار کے اشتہار کے ذریعے فراڈ کا جرم ثابت ہونے پر عدالت نے مجرم حسان شاہ کو 3 سال قید کی سزا سنا دی۔
جوڈیشل مجسٹریٹ وسطی کی عدالت میں سوشل میڈیا پر کار کے اشتہار کے ذریعے فراڈ اور دھوکا دہی کے کیس کی سماعت ہوئی، عدالت نے مجرم حسان شاہ کو تین سال قید کی سزا سنا دی اور 35 ہزار روپے جرمانہ بھی عائد کر دیا، جس کی عدم ادائیگی پر مزید 3 ماہ قید کاٹنی ہوگی۔
اِستغاثہ نے عدالت کو بتایا کہ حسان شاہ نے نجی کمپنی کے نام سے قسطوں پر کار کا اشتہار چلایا، مدعی معروف نے آفس کا دورہ کیا، اور 4 لاکھ 95 ہزار کا چیک دیا لیکن پیسے لینے کے بعد بھی مدعی کو کار نہیں دی گئی۔
مدعی نے عدالت میں کمپنی کی رقم وصولی کی رسید بھی پیش کی، استغاثہ نے بتایا کہ نجی کمپنی کا آفس ملزم کے نام سے ہی رجسٹرڈ تھا، ملزم پہلے بھی اس طرح کے 12 کیسز میں ملوث ہے۔
عدالت میں ملزم نے عدالت میں صحت جرم سے انکار کیا تاہم وہ عدالت میں خود کو بے قصور ثابت کرنے میں ناکام رہا، استغاثہ کے مطابق مقدمے میں 2 سے زائد ملزمان مفرور ہیں، جب کہ واقعے کا مقدمہ تھانہ ناظم آباد میں درج کیا گیا تھا۔
