کابل: افغانستان کے دارالحکومت کابل میں بڑا خود کش حملہ ہوا ہے، جس میں دس افراد جان سے گئے.
تفصیلات کے مطابق جمعرات کے روز کابل میں نیٹو فوجی مشن کے ہیڈکوارٹرز اور امریکی سفارت خانے کے قریب خود کش حملہ ہوا.
علاقے میں بڑا دھماکا سنا گیا، عمارتوں کے شیشے ٹوٹ گئے. حملے میں چالیس افراد زخمی ہوئے، دس کی ہلاکت کی تصدیق ہوگئی ہے، ہلاک ہونے والے تمام افراد عام شہری تھے.
حملہ بارود سے بھری ایک چھوٹی بس کے ذریعے کیا گیا، حملے میں آس پاس کی گاڑیاں بھی لپیٹ میں آئیں اور مکمل طور پر تباہ ہوگئیں.
ذرائع کے مطابق طالبان کے ترجمان ذبیح اللہ مجاہد نے اس خود کش بم حملے کی ذمے داری قبول کی ہے۔
مزید پڑھیں: افغان طالبان کا کابل میں خود کش حملہ، 16 ہلاک، 119 زخمی
خیال رہے کہ یہ سفارتی علاوہ بہت حساس اور محفوظ تصور کیا جاتا ہے، البتہ گزشتہ تین دنوں میں یہ اس علاقے میں ہونے والا دوسرا حملہ ہے. 3 ستمبر کو خودکش کار بم دھماکے میں 16 افراد ہلاک اور 119 افراد زخمی ہوئے تھے۔
یاد رہے کہ اس وقت امریکا اور افغان طالبان کے درمیان اعلیٰ سطح پر مذاکرات جاری ہیں. امریکا نے مذاکرات میں کامیابی کا امکان ظاہر کیا ہے.
