کراچی: گلشن اقبال میں دو روز قبل شہری کو اغوا کر کے کار چھیننے کی سی سی ٹی وی فوٹیج سامنے آ گئی۔
کراچی کے علاقے گلشن اقبال میں کار سوار مسلح ملزمان نے گلشن تھانے کے قریب مسکن پر کار چھیننے کی بڑی واردات کی اور فرار ہو گئے، واردات کی فوٹیج اے آر وائی نیوز نے حاصل کر لی ہے۔
واقعے میں 5 ملزمان شہری کو کار سمیت اغوا کر کے لے گئے تھے، اس واردات کا مقدمہ گلشن اقبال تھانے میں درج کر لیا گیا ہے۔
فوٹیج میں دیکھا جا سکتا ہے کہ ملزمان نے مسکن کے قریب سڑک پر کار روکی، کار سے 4 ملزمان اتر کر مطلوبہ کار کی جانب گئے، ٹرانسپورٹ کمپنی کا ملازم محمد علی چکن لے کر دکان سے نکلا، اور ڈگی میں سامان رکھ کر کار میں بیٹھ گیا۔
کراچی میں منشیات فروشی کی آمدنی سے دہشت گردوں کی فنڈنگ کا انکشاف
فوٹیج کے مطابق چاروں طرف کھڑے ملزمان نے اچانک سے کار گھیر لیا، اور شہری کو کار کے اندر ہی زبردستی بٹھا لیا، پھر ملزمان دونوں کاروں میں فرار ہو گئے۔ ذرائع کا کہنا ہے کہ شہری محمد علی کو اغوا کے بعد ناردرن بائی پاس لے جایا گیا تھا، اور ایک سنسان جگہ پر شہری کو اتار کر ملزمان فرار ہو گئے۔
نذیر شاہ کراچی میں اے آر وائی نیوز سے وابستہ سینئر صحافی اور کرائم رپورٹر ہیں، وہ 14 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔