پشاور: سیاسی تلخی میں تازہ ہوا کا جھونکا، خیبر پختونخواہ میں نگراں وزیراعلیٰ کا نام فائنل کرلیا گیا۔
تفصیلات کے مطابق اسپیکر ہاؤس میں وزیراعلیٰ محمود خان اور اپوزیشن لیڈراکرم دارنی نے میڈیا سے گفتگو میں بتایا کہ نگراں وزیراعلیٰ کیلئےاعظم خان کےنام پراتفاق ہوگیا ہے۔
اپوزیشن لیڈراکرم درانی نے بتایا کہ اعظم خان ریٹائرڈبیورو کریٹ اورسابق چیف سیکریٹری رہ چکے ہیں اور صوبے میں اچھی ساکھ کے حامل ہیں
باہمی مشاورت کے بعد میڈیا سے گفتگو کرتے ہوئے اپوزیشن لیڈر خیبرپختونخوا اکرم خان درانی نے کہا کہ ہم نےمشورہ کیا کہ قوم کو مزید مشکلات میں نہیں ڈالیں گے، معاملہ خوش اسلوبی سے طے ہونے پر وزیراعلیٰ محمود خان، پرویزخٹک اوراسپیکرصاحب کا مشکور ہوں۔
اکرم خان درانی نے بتایا کہ دو تین نام میرے پاس تھے جبکہ دو نام میرے پاس، ان کے نام بھی اچھےتھےاور ہمارے نام بھی، اعظم خان اورظفراللہ خان ہماری طرف سےتھے جبکہ اویس حیا الدین،صاحبزادہ سعید کا نام ان کا تھا۔
یہ بھی پڑھیں: کے پی حکومت کی جانب سے نگراں وزیر اعلیٰ کیلیے 2 نام زیرِ غور
انہوں نے بتایا کہ مشورہ کیا کہ ایک ایسا آدمی ہو جو معیشت اور صوبےکےحالات سے واقف ہو، ان سب میں بہترکا چناؤ کیا اور ہمارا اعظم خان کےنام پراتفاق ہوگیا۔
یاد رہے کہ صوبائی اسمبلی تحلیل ہونے کے بعد گورنر حاجی غلام علی نے وزیراعلیٰ محمودخان اور اپوزیشن لیڈراکرم درانی کو نگران وزیراعلیٰ کے تقرر کے سلسلے میں مشاورت کرنے کی ہدایت اور اپنے تعاون کی یقین دہانی کرائی تھی۔
واضح رہے کہ اعظم خان چیف سیکرٹری سمیت دیگر عہدوں پر رہ چکے ہیں، وہ سابق نگراں وفاقی وزیر بھی رہے، اس کے علاوہ وہ پیٹرولیم اور مذہبی امور کی وزارتوں کے وفاقی سیکریٹری بھی رہے ہیں۔
