لاہور : نگراں وزیر اعلیٰ پنجاب محسن نقوی نے ہنگامہ آرائی میں مبینہ طور پر پی ٹی آئی کارکن کی ہلاکت کی فوری تحقیقات کا حکم دے دیا۔
تفصیلات کے مطابق نگراں وزیر اعلیٰ پنجاب محسن نقوی نے ہنگامہ آرائی میں مبینہ طور پر ہلاکت کا نوٹس لے لیا اور واقعےکی فوری تحقیقات کا حکم دے دیا۔
سی سی پی اولاہور نے بتایا کہ مکمل غیر جانبدرانہ اور حقائق وشواہد پر مبنی انکوائری کرنے کا حکم دیا ہے ، جو بھی ملوث پایا جائے، قانون کے تحت انصاف کے تقاضے پورے کئے جائیں
سی سی پی او لاہور نے کہا کہ پی ٹی آئی کی وڈیوز آج کی نہیں بلکہ پرانی اور جیل بھرو تحریک کی ہیں، دانستہ جھوٹ پھیلایا جا رہا ہے کہ یہ شخص پولیس حراست میں تھا۔
ان کا کہنا تھا کہ سی سی ٹی وی فوٹیج سے انکشاف ہوا کہ جاں بحق شخص کو پرائیویٹ گاڑی اسپتال چھوڑکر گئی ، سیف سٹی کیمروں سے اس گاڑی ،سواروں کی تلاش جاری ہے۔
سی سی پی او نے مزید کہا کہ پوسٹ مارٹم، سیف سٹی رپورٹ کے بعد درست حقائق کا تعین ممکن ہو گا۔
انھوں نے بتایا کہ پی ٹی آئی کے کارکنوں کے تشدد سے11 پولیس اہلکار زخمی ہوئے، جس میں سبزہ زار اور ٹاؤن شپ کے ڈی ایس پیز، ایس ایچ او ہنجروال بھی شامل ہیں جبکہ 8 پولیس اہلکار بھی زخمی ہوئے۔
