لاہور : مسجد وزیر خان کا تقدس پامال کرنے کے معاملے پر گلوکار بلال سعید اور اداکارہ صبا قمر کے خلاف مقدمہ درج کرنے کیلئے درخواست دائر کردی گئی، جس میں کہا گیا کہ مسجد میں گانے کی عکسبندی کی گئی، جس سے مسجد کا تقدس پامال ہوا۔
تفصیلات کے مطابق مسجد وزیر خان کا تقدس پامال کرنے کے معاملے پر گلوکار بلال سعید اور اداکارہ صبا قمر کے خلاف سیشن کورٹ میں اندراج مقدمہ کی درخواست دائر کر دی گئی۔
سردار منظور چانڈیو ایڈووکیٹ کی جانب سے اندراج مقدمہ کی درخواست دائر کی گئی، درخواست گزار نے موقف اختیار کیا ہے کہ مسجد وزیر خان میں بلال سعید اور صبا قمر پر گانے کی عکسبندی کی گئی، جس سے مسجد کا تقدس پامال ہوا۔
درخواست میں کہا گیا مسجد کے تقدس کو پامال کرنے کی پوسٹیں سوشل میڈیا پر بھی شئیر کی گئی ہیں، مسجد کے اندر ڈانس اور گانا عکسبند کر کے مسلمانوں کے جذبات کو ٹھیس پہنچائی گئی ہے۔
مزید پڑھیں : مسجد میں گانے کی شوٹنگ کا معاملہ، مینیجر اوقاف معطل
دائر درخواست میں استدعا کی گئی ہے کہ صبا قمر اور بلال سعید کے خلاف مقدمہ درج کرنے کا حکم دیا جائے۔
گذشتہ روز مسجد وزیر خان میں گانے کی شوٹنگ کے معاملے پر صوبائی وزیر اوقاف و مذہبی امور سید سعید الحسن شاہ کی ہدایت پر مینیجر اوقاف کو معطل کردیا گیا تھا۔
مسلم لیگ ق کے رہنما چوہدری شجاعت حسین نے مسجد میں گانے کی شوٹنگ کی شدید الفاظ میں مذمت کرتے ہوئے کہا ہے کہ لاہور کی مسجد وزیر خان کا تقدس پامال کرنے والے ابھی تک آزاد کیوں ہیں؟ افسوس ہے کہ اس کی اجازت دینے والوں بھی پکڑ کر جیل میں نہیں ڈالا گیا، ذمہ داروں کو گرفتار کریں تاکہ آئندہ کوئی مسجد کا تقدس پامال کرنے کی جسارت نہ کرے۔
خیال رہے کہ پاکستانی گلوکار بلال سعید اور اداکارہ صبا قمر نے اپنے آنے والے گانے ‘قبول ہے’ کی شوٹنگ کے دوران چند تصاویر اور ویڈیو شیئر کیں تھی جو کہ مسجد وزیر خان کے اندر شوٹ کیا گیا تھا، جس کے بعد مسجد کا تقدس پامال کرنے پر طوفان برپا ہے، سوشل میڈیا صارفین کی جانب سے بھی شدید تنقید کا نشانہ بنایا جارہا ہے۔
