اسلام آباد : خاتون جج کو دھمکی کے کیس میں چیئرمین پی ٹی آئی عمران خان نے ناقابل ضمانت وارنٹ گرفتاری چیلنج کردیے۔
تفصیلات کے مطابق ڈسٹرکٹ اینڈسیشن کورٹ اسلام آباد میں چیئرمین پی ٹی آئی عمران خان کی لیگل ٹیم کی جانب سے ناقابل ضمانت وارنٹ گرفتاری چیلنج کردیئے گئے۔
سیشن جج طاہر محمود کے رخصت پر ہونے کے باعث ڈیوٹی جج سکندر خان کی عدالت میں درخواست دائر کی گئی۔
عمران خان کے وکیل نعیم حیدر پنجوتھا اور انتظار حیدر پنجوتھا کی جانب سے درخواست دائر کی گئی۔
ڈیوٹی جج سکندر خان نے درخواست ایڈیشنل سیشن جج فیضان حیدر گیلانی کو مارک کر دی۔
گذشتہ روز خاتون جج دھمکی کیس میں سینئر سول جج رانا مجاہد رحیم نے مسلسل عدم حاضری پر عمران خان کے ناقابل ضمانت وارنٹ گرفتاری جاری کر رکھے ہیں۔
سول جج رانا مجاہد رحیم نے خاتون جج کو دھمکی دینے کے کیس کی سماعت میں عمران خان کے حاضری سے استثنیٰ کی درخواست پیش کی گئی تھی.
جس پر جج نے ریمارکس دیتے تھے کہ عدالتی اوقات تک انتظار کر لیتے ہیں، عمران خان آج پیش نہیں ہوتے تو وارنٹ جاری کردیں گے۔
