کراچی : کورنگی کراسنگ کے قریب ایم کیو ایم لندن کی ریلی ریلی نکالنے پر بانی ایم کیو ایم سمیت 90 افراد افراد پر مقدمہ درج کر لیا گیا۔
تفصیلات کے مطابق پولیس نے کراچی کے علاقے کورنگی کراسنگ کے قریب ایم کیو ایم لندن کی ریلی کے معاملے پر زمان ٹاؤن تھانے میں بانی ایم کیو ایم سمیت درجنوں افراد پرمقدمہ درج کرلیا۔
پولیس کا کہنا ہے کہ موقع پر موجود ایم کیو ایم لندن کے 4 کارکنان کو بھی گرفتار کرلیا گیا ہے۔
سرکار مدعیت میں درج مقدمےمیں 89افراد کو نامزدکیا گیا ہے ، مقدمے میں بلوہ ،راستہ بلاک کرنےسمیت دیگردفعات شامل کی گئی ہے۔
مقدمے کے متن میں کہا گیا ہے کہ 90 کے قریب موٹرسائیکل اور کار سوارکورنگی کراسنگ کے قریب سڑک بلاک کرکے کھڑے تھے اور بانی ایم کیو ایم کی حمایت میں نعرے بازی کی جا رہی تھی، جن کو منتشر کرنے کی کوشش کی گئی تو انہوں نے ہنگامہ آرائی شروع کردی اور نعرے لگاتے ہوئے فرار ہوگئے۔
مقدمہ مدعی اسسٹنٹ سب انسپکٹر ناصر جمال کا کہنا تھا کہ اہلکاروں کی مدد سے موقع پر ہی 4 ملزمان محمد علی ، ساجد ، جاوید اور سلیم شامل کو گرفتار کیا، ایف آئی آر میں 39 نامزد اور 50 صورت شناس عناصرکو شامل کیا گیا ہے۔
مدعی مقدمہ کے مطابق ریلی نکال کر ہنگامی آرائی بانی ایم کیو ایم کی ایماء پر کی گئی ہے، معاملے کی تحقیقات تفتیشی افسر کے سپرد کر دی گئی ہے۔
یاد رہے ایم کیو ایم لندن کی جانب سے کورنگی میں نکالی جانے والی ریلی کے بعد کراچی میں بڑے پیمانے پر کریک ڈاؤن کا فیصلہ کرلیا گیا ہے۔
اس حوالے سے ذرائع کا کہنا تھا کہ حکومت سندھ اور سیکیورٹی اداروں کو ایم کیو ایم لندن کیخلاف سخت کارروائیوں کا حکم جاری کردیا گیا ہے، احکامات ملتے ہی متعلقہ افسران کی جانب سے کراچی کے علاقے کورنگی کی ریلی میں شریک ایم کیوایم لندن کے کارکنان کی گرفتاریوں کا آغاز کردیا تھا۔
