کراچی : شہر قائد میں پولیس نے نجی کمپنی کی کیش وین کو لوٹنے والے 5 میں سے 3ملزمان کو رنگے ہاتھوں گرفتار کرلیا، ملزمان میں ڈرائیور بھی شامل ہے۔
تفصیلات کے مطابق کراچی کے علاقے کورنگی صنعتی ایریا پولیس نے بروقت کارروائی کرکے نجی کمپنی کی کیش وین میں لاکھوں روپے مالیت کی ڈکیتی کی واردات کو ناکام بنادیا۔
اس حوالے سے پولیس حکام نے میڈیا کو بتایا کہ نجی فیکٹری کی ڈلیوری کیش وین جوڑیا بازار سے واپسی پر کورنگی کاز وے روڈ پر پہنچی گاڑی میں موجود سیلزمین نے خطرہ بھانپ لیا۔
پولیس کے مطابق کیش لوٹنے کیلئے دو موٹرسائیکلوں پر4ملزمان وین کے قریب آئے، جس پر سیلزمین نے ڈرائیور کو گاڑی تیز چلانے کا کہا۔
کورنگی صنعتی ایریا پولیس کے مطابق وین کے ڈرائیور نے اسلحہ نکال کر سیلزمین کے سر پر رکھ دیا اور رقم اپنے قبضے میں لے لی، بعد ازاں ملزمان رقم لوٹ کر فرار ہورہے تھے کہ اس دوران گشت پر مامور پولیس پارٹی موقع پر پہنچ گئی۔
مزید پڑھیں: کیش وین سے 15 کروڑ ڈکیتی کا معمہ حل، نجی کمپنی کا ڈرائیور ملوث نکلا
پولیس اہکاروں نے فوری کارروائی کرتے ہوئے 2ملزمان اور وین ڈرائیور کو اسلحہ سمیت گرفتار کرلیا۔ گرفتار ڈاکوؤں اور ڈرائیور سے اسلحہ،3پستول اور لوٹی ہوئی5لاکھ روپے کی رقم برآمد کرلی گئی ہے۔
پولیس کے مطابق ملزمان کے2 ساتھی بقایا رقم لے کر فرار ہونے میں کامیاب ہوگئے تاہم انہیں بھی جلد گرفتار کرلیا جائے گا۔
