The news is by your side.

Advertisement

بلیوں پر ہونے والی ایک بڑی تحقیق میں اہم انکشاف

ہیلسنکی: بلیوں کے رویوں پر ایک سروے کے بعد ایک نئی تحقیق سے پتا چلا ہے کہ بلیوں کی شخصیت اور رویے کی 7 خصلتیں ہوتی ہیں۔

تفصیلات کے مطابق فن لینڈ کی ہیلسنکی یونیورسٹی کی تحقیق میں‌ انکشاف ہوا ہے کہ بلیاں بھی 7 مختلف طرح کی شخصیتی خواص کی حامل ہوتی ہیں۔

محققین کا کہنا ہے کہ انسان ہی نہیں بلیوں کی شخصیت بھی ایک دوسرے سے بہت مختلف ہوتی ہے، اس سلسلے میں ایک ریسرچ میں بلیوں کے برتاؤ پر ایک جامع تجزیہ کیا گیا، جس میں 26 مختلف نسلوں کی 4 ہزار 300 سے زائد بلیوں کی عادات و اطوار سے متعلق معلومات اور اعداد و شمار کا جائزہ لیا گیا۔

ریسرچ اسٹڈی کی شریک مصنفہ سیلا میکولا نے بتایا کہ بلی دنیا کا سب سے عام پالتو جانور ہے، لیکن کتوں کو پسند کرنے والے انھیں کتوں کے مقابلے میں کم حساس سمجھتے ہیں۔ دوسری طرف محققین کا کہنا ہے کہ کتوں کے مقابلے میں بلیوں کے طرز عمل اور شخصیت سے متعلق اب تک ہم بہت کم جانتے ہیں، ضرورت ہے کہ انھیں زیادہ جانا جائے۔

سیلا میکولا کا کہنا تھا کہ ہمیں بلیوں کے پریشان کن طرز عمل کو مزید جاننے کی ضرورت ہے، بلیوں کا سب سے عام مسئلہ ان میں پیدا ہونے والا جارحانہ مزاج ہے۔

تحقیق سے معلوم ہوا ہے کہ بلیوں میں شخصیت اور برتاؤ کے حوالے سے 7 خصلتیں پائی جاتی ہیں، ان میں جوش اور چنچل پن، خوف زدگی، انسانوں کے خلاف جارحیت، انسانوں سے ملنساری، بلیوں سے ملنساری، رہنے کی جگہ پر گندگی پھیلانا اور بہت زیادہ بناؤ سنگھار کرنا شامل ہیں۔

اس مطالعے کی سربراہ پروفیسر ہینیس لوہی کہتی ہیں کہ سب سے زیادہ خوف زدہ رہنے والی بلیوں میں روسی بلیاں جب کہ سب سے کم خوف زدہ بلیوں میں ابی سینا (Abyssinian) یعنی موجودہ ایتھوپیا کی نسل کی بلیاں شامل ہیں۔

تحقیق میں یہ بھی معلوم ہوا کہ بنگالی بلی کو سب سے زیادہ متحرک، جب کہ فارسی (پرشین) اور ایگزوٹک نسل والی بلیوں کو سب سے سست پایا گیا۔

تحقیق کے مطابق سیامی اور بالینیز (جزیرہ بالی) بلیاں سب سے زیادہ بناؤ سنگھار کی شوقین ہوتی ہیں، جب کہ دنیا میں بلیوں کی سب سے نایاب نسل ’ٹرکش وین‘ (ترکی میں پائی جانے والی بلی) انسانوں پر حملہ کرنے میں سب سے نمایاں ہونے کے علاوہ دیگر بلیوں سے میل جول رکھنا بھی پسند نہیں کرتی۔

Comments

یہ بھی پڑھیں