اسلام آباد : ڈیجیٹل مردم شماری کی منظوری کیلئے مشترکہ مفادات کونسل کا اجلاس آج ہوگا، منظوری کے بعد ڈیجیٹل مردم شماری کانوٹیفکیشن جاری ہوگا۔
تفصیلات کے مطابق مشترکہ مفادات کونسل کا 50واں اجلاس آج ہوگا، مشترکہ مفادات کونسل میں ساتویں مردم شماری کی منظوری دی جائے گی۔
وزیراعظم شہباز شریف مشترکہ مفادات کونسل کی صدارت کریں گے، اجلاس میں وزیراعلیٰ سندھ مراد علی شاہ، نگران وزیراعلیٰ پنجاب محسن نقوی ، سیکرٹری بلوچستان سمیت وزیرخزانہ اسحاق ڈار، قمرزمان قائرہ شریک ہوں گے۔
مشترکہ مفادات کونسل میں ڈیجیٹل مردم شماری کے نتائج پیش کئے جائیں گے ، بیوروشماریات سے کمشنر سینسس، چیف شماریات بیورو و دیگر حکام پہنچ گئے۔
وزارت منصوبہ بندی و ترقی ڈیجیٹل مردم شماری کے حوالے کونسل کو بریفنگ دے گی ، جس کے بعد نئی ڈیجیٹل مردم شماری کے تحت ملکی مجموعی آبادی کی منظوری دی جائے گی۔
سی سی آئی کی منظوری کے بعد ڈیجیٹل مردم شماری کانوٹیفکیشن جاری ہوگا ، ڈیجیٹل مردم شماری کا نوٹیفکیشن الیکشن کمیشن کے حوالے کیا جائے گا۔
ذرائع کے مطابق الیکشن کمیشن نوٹیفکیشن کی روشنی میں نئی حلقہ بندیاں کرنے کا پابند ہوگا، الیکشن کمیشن 4 سے 6 ماہ میں نئی حلقہ بندیاں کرنے کا پابند ہوگا، نئی حلقہ بندیوں کے بعدعام انتخابات کا انعقاد ممکن ہوسکے گا۔
