مانچسٹر: برطانیہ میں خاتون وزیر صحت کے بعد دوسری بڑی شخصیت میں کرونا وائرس کی تشخیص ہوئی ہے۔
تفصیلات کے مطابق برٹش ٹیلی کام کے چیف ایگزیکٹو فلپ جانسن کرونا وائرس کا شکار ہو گئے ہیں، ٹیسٹ مثبت آنے پر فلپ جانسن نے خود کو گھر میں محدود کر لیا۔
برطانوی میڈیا کے مطابق گزشتہ چند روز میں فلپ جانسن نے انڈسٹری کی کئی شخصیات سے ملاقاتیں کی ہیں، وائرس کی تشخیص کے بعد ملاقات کرنے والے افراد کو مطلع کر دیا گیا۔
کینیڈین وزیر اعظم کی اہلیہ بھی کرونا وائرس کا شکار ہوگئیں
دوسری طرف این ایچ ایس نے نان ایمرجنسی آپریشنز معطل کرنے پر سوچ بچار شروع کر دیا ہے، این ایچ ایس برطانیہ نے تمام مقامی اسپتالوں سے نان ایمرجنسی سرجریز کے متعلق ڈیٹا جمع کرنے کی ہدایات کی ہے۔ این ایچ ایس کی ویٹنگ لسٹ پر اس وقت 46 لاکھ مریض ہیں جن کی سرجریز ہونی ہیں۔ چیف ایگزیکٹو این ایچ ایس کرس ہوپ سن کا کہنا تھا کہ یہ اقدام این ایچ ایس کو کرونا سے نمٹنے کے لیے تیار کرنے کے لیے اٹھایا گیا ہے۔
خیال رہے کہ گزشتہ روز برطانیہ کے شہر مانچسٹر میں کرونا وائرس سے متاثرہ مزید 2 افراد ہلاک ہو گئے ہیں، جس کے بعد برطانیہ میں کرونا وائرس سے ہلاکتوں کی تعداد 10 ہو گئی ہے۔ برطانیہ میں کرونا وائرس کے 590 کیسز سامنے آ چکے ہیں، این ایچ ایس اب تک 29764 افراد کے ٹیسٹ کرچکا ہے۔
