اسلام آباد : چیئرمین کشمیر کمیٹی شہریارآفریدی نے کہا ہے کہ مسئلہ کشمیر پر روڈ میپ کیلئے سب کو ساتھ بیٹھنے کی دعوت دیتا ہوں، ہم سنیں گے آپ اس کا حل بتائیں۔
ان خیالات کا اظہار انہوں نے کل جماعتی کانفرنس سے خطاب کرتے ہوئے کیا، شہریار آفریدی نے کہا کہ معاشی طور پر مضبوط نہ ہونے تک دنیا آپ کے ساتھ نہیں چلتی، جب تک ہم ایک نہیں ہوں گے اللہ کی مدد بھی نہیں آئے گی۔
انہوں نے کہا کہ سب آئیں،مل کر بیٹھتے ہیں، کشمیر کمیٹی آپ کو سنے گی حل بتائیں، ایک دوسرے کو ماضی ہی یاد کراتے رہیں گے تو کچھ نہیں ہوگا، آج ماضی کے باب کو بند کرکےایک ساتھ بیٹھ جاتے ہیں۔
شہریار آفریدی نے کہا ہے کہ کشمیر کمیٹی تمام سیاسی جماعتوں کا نمائندہ فورم ہے، مسئلہ کشمیر پر روڈ میپ کیلئے سب کو ساتھ بیٹھنے کی دعوت دیتا ہوں، حیران ہوں ابھی تک کوئی آگےنہیں آرہا، آئیں کشمیر پر مشترکہ روڈ میپ تیار کرکے آگے بڑھیں۔
چیئرمین کشمیر کمیٹی کا کہنا تھا کہ گزشتہ روز سوشل میڈیا پر آسیہ اندرابی کیلئے ایک ٹرینڈ چلایا، کشمیر پر دنیا میں آواز پہنچانے کیلئے جدید ذرائع استعمال کرنا ہوں گے،8لاکھ صارفین کی درخواست پر گوگل نے فلسطین کو دنیا کے نقشے میں واپس دکھایا۔
ان کا مزید کہنا تھا کہ عالمی برادری مفادات،معاشیات کی بنا پر معاملات کو دیکھتی ہے، بدقسمتی سے ملک میں نظام تعلیم کاروبار بن چکا ہے، وزیراعظم نے جلد ملک میں یکساں نظام تعلیم لانے کا اعلان کر رکھا ہے۔
