اسلام آباد پولیس نے تحریک انصاف کے صدر چوہدری پرویز الٰہی کی رہائی کے بعد دوبارہ گرفتاری سے متعلق وضاحت جاری کردی ہے۔
ترجمان پولیس کے مطابق چوہدری پرویزالٰہی کو تھانہ سی ٹی ڈی میں درج مقدمے میں حراست میں لیا گیا ہے، ان کو جوڈیشل کمپلیکس حملہ کیس میں گرفتار کیا گیا ہے۔
ترجمان پولیس کا کہنا ہے کہ تھانہ سی ٹی ڈی میں پرویزالٰہی کیخلاف3ستمبر کو مقدمہ درج کیا گیا تھا، پولیس لائنز کے باہرسے سی ٹی ڈی اہلکاروں نے پرویزالٰہی کو گرفتار کیا۔
پولیس کے مطابق پرویزالہٰی کو تھانہ سی ٹی ڈی نے مقدمہ نمبر3/23میں گرفتار کیا، پرویزالٰہی کو کل انسداد دہشت گردی عدالت میں پیش کیا جائے گا۔
علاوہ ازیں پمز اسپتال سے ڈاکٹرز کی ٹیم پرویز الٰہی کے چیک اپ کیلئے پولیس لائنزپہنچ گئی، ذرائع نے بتایاکہ ڈاکٹرز کی ٹیم ان کا چیک اپ کرے گی۔
واضح رہے کہ گزشتہ روز لاہور ہائی کورٹ نے پرویزالہیٰ کو آج عدالت میں پیش کرنے کا حکم دیتے ہوئے ریمارکس دیئے تھے کہ اس کیس میں توہین عدالت اور محکمانہ کارروائی ہوگی۔
دوسری جانب قومی احتساب بیورو (نیب) نے یکم ستمبر کو لاہور ہائی کورٹ کا پرویز الہیٰ کو کسی بھی مقدمے میں گرفتار نہ کرنے کا حکم چیلنج کردیا ہے۔
گزشتہ روز لاہور ہائیکورٹ میں پرویزالہٰی کی بازیابی کا کیس منگل یعنی آج کی کازلسٹ سے نکال دیا گیا تھا۔
