اسلام آباد: قومی احتساب بیورو (نیب) کے چیئرمین جاوید اقبال نے کہا ہے کہ بیوروکریسی قانون کے مطابق کام کرے گی تو نیب کیوں بلائے گا۔
تفصیلات کے مطابق چیئرمین نیب نے کابینہ ڈویژن میں وفاقی سیکریٹریز سے خطاب کرتے ہوئے کہا کہ بیوروکریسی ملک کے لیے ریڑھ کی ہڈی کی حیثیت رکھتی ہے۔
[bs-quote quote=”ہزاروں مقدمات کا جائزہ لیا ہے، بیوروکریسی کے خلاف مقدمات نہ ہونے کے برابر ہیں۔” style=”style-7″ align=”left” color=”#dd3333″ author_name=”چئیرمین نیب”][/bs-quote]
انھوں نے کہا ’بیوروکریسی قانون اور آئین کے مطابق کام کرے، وہ قانون کے مطابق کام کرے گی تو نیب کیوں بلائے گا۔‘
چیئرمین نیب جاوید اقبال کا کہنا تھا کہ وہ بیوروکریسی کے مسائل سے بھی آگاہ ہیں، انھوں نے کہا کہ وہ نیب کو آزاد ادارہ بنانے کی کوشش کر رہے ہیں۔
ان کا کہنا تھا ’یہ پروپیگنڈا کیا گیا کہ نیب کی وجہ سے بیوروکریسی نے کام چھوڑ دیا ہے، نیب کے پاس موجود ہزاروں مقدمات کا جائزہ لیا ہے، بیوروکریسی کے خلاف مقدمات نہ ہونے کے برابر ہیں۔‘
قومی احتساب بیورو کے چیئرمین نے مزید کہا کہ عدالت سے بھی بیوروکریسی کے قانونی اقدامات کا تحفظ کیا جا رہا ہے۔
یہ بھی پڑھیں: نیب کوقومی ادارہ بنائیں، خوف کی علامت نہیں، چیف جسٹس سندھ ہائی کورٹ برہم
خیال رہے کہ آج سندھ ہائی کورٹ کے چیف جسٹس نے ایک کیس میں تفتیشی افسر کی غیر حاضری پر نیب حکام پر برہمی کا اظہار کرتے ہوئے کہا کہ نیب کو قومی ادارہ بنائیں، خوف کی علامت نہیں، جس کے خلاف ثبوت نہیں انھیں گھسیٹنا چھوڑ دیں، یہی وجہ ہے نیب انکوائریز میں تاخیر ہو رہی ہے، کیوں نہ چیئرمین نیب کو طلب کر لیا جائے؟
