کراچی : وزیراعظم عمران خان کی ہدایت پر نیشنل ڈیزاسٹر منیجمنٹ اتھارٹی (این ڈی ایم اے) کے چیئرمین لیفٹیننٹ جنرل محمد افضل کراچی پہنچ گئے ، وہ کراچی کی صورتحال پر اہم اجلاس کی صدارت کریں گے۔
تفصیلات کے مطابق نیشنل ڈیزاسٹر منیجمنٹ اتھارٹی (این ڈی ایم اے) کے چیئرمین لیفٹیننٹ جنرل محمد افضل کراچی پہنچ گئے ، وہ اس دوران گورنر سندھ عمران اسماعیل سے ملاقات کریں گے جبکہ انھوں نے کراچی کی صورتحال پر اہم اجلاس بھی طلب کرلیا ہے۔
گذشتہ روز وزیراعظم عمران خان نے کراچی کی صفائی کے لیے فوج کو طلب کرتے ہوئے چیئرمین این ڈی ایم اے لیفٹیننٹ جنرل محمد افضال کو کراچی پہنچنے کی ہدایت کی تھی۔
وزیراعظم نے اپنے پیغام میں چیئرمین این ڈی ایم اے کو فوری کراچی پہنچنےاور بارش کے بعد کراچی کی فوری صفائی کی ہدایت کی تھی۔
واضح رہے کہ کراچی میں بارش کے بعد سے اب تک مختلف سڑکوں پر پانی جمع ہے اور شہریوں کو مشکلات کا سامنا ہے، گٹر ابل رہے ہیں اور نالوں کا پانی گھروں میں داخل ہوگیا جس کے سبب شہریوں نے رات چھتوں پر گزاری تھی۔
