اسلام آباد: وفاقی حکومت نے پہلی بار چیئرمین پبلک اکاؤنٹس کمیٹی (پی اے سی) کی سربراہی کیلیے اپوزیشن سے چار نام مانگ لیے۔
ذرائع نے اے آر وائی نیوز کو بتایا کہ چیف وہپ طارق فضل کی جانب سے قوم اسمبلی میں قائد حزب اختلاف عمر ایوب کو خط لکھا گیا جس میں ان سے چیئرمین پی اے سی کیلیے چار مانگے گئے۔
ذرائع کے مطابق خط میں لکھا گیا کہ چیئرمین پبلک اکاؤنٹس کمیٹی کیلیے سینئر اور تجربہ کار لوگوں کے نام دیے جائیں، باہمی رضا مندی سے ناموں میں چیئرمین کا انتخاب کیا جائے گا۔
ذرائع کے مطابق خط کی کاپی پی ٹی آئی چیف وہپ عامر ڈوگر کو ارسال کر دی گئی۔
یاد رہے کہ اپریل میں پی ٹی آئی چیئرمین پبلک اکاؤنٹس کمیٹی کیلیے شیر افضل مروت کا نام فائنل کیا تھا جو اس وقت پارٹی قیادت سے نالاں ہیں۔
چیئرمین پی ٹی آئی بیرسٹر گوہر نے بتایا تھا کہ بانی پی ٹی آئی سے اڈیالہ جیل میں ملاقات ہوئی، پی اے سی کی سربراہی کیلیے بانی پی ٹی آئی نے شیر افضل مروت کا نام فائنل کیا۔
بعدازاں مئی میں حکومت نے پبلک اکاؤنٹس کمیٹی کی سربراہی سنی اتحاد کونسل کو دینے کا فیصلہ کیا تھا۔ سنی اتحاد کونسل نے شیخ وقاص اکرم کو چئیرمین پی اے سی کیلیے نامزد کیا تھا۔
