کراچی : چیئرمین پی آئی اے ایئر وائس مارشل ارشد محمود ملک نے کہا ہے کہ پی آئی اے کو اس کا کھویا ہوا مقام واپس دلائیں گے، ادارے کے کارکنان اس کا سرمایہ ہیں۔
یہ بات انہوں نے بحیثیت چیئرمین پی آئی اے کا چارج سنبھالنے کے بعد کارکنان کے نام اپنے ایک پیغام میں کہی، ارشد ملک کا کہنا تھا کہ پی آئی اے کی ترقی کیلئے سب کو کردارادا کرنا ہوگا، ادارے سے کسی کو بھی ملازمت سے نکالا نہیں جائے گا تاہم بدعنوان اور ادارے کی بدنامی کا باعث بننے والوں سے کوئی رعایت نہیں کی جائے گی۔
چیئرمین پی آئی اے کا مزید کہنا تھا کہ ہمارا ادارہ اس وقت معاشی اور انتظامی مشکلات میں گھرا ہوا ہے، پی آئی اے کی موجودہ حالت پوری قوم کیلئے تکلیف کا باعث بنی ہوئی ہے۔
انہوں نے کہا کہ ہمیں قائد اعظم کے رہنما اصولوں ایمان اتحاد اور تنظیم کے تحت قلیل وقت میں پی آئی اے کو اس کا کھویا ہوا مقام واپس دلانا ہے، پی آئی اے کو نقصان سے نکال کر منافع بخش ادارے میں تبدیل کر دیا جائے گا۔
آمدنی کو بڑھانے اور غیر ضروروی اخراجات کو کم کرنے کیلئے اقدامات کریں گے، ہرسطح پر میرٹ کو فروغ دیا جائے گا، افرادی قوت کی بہبود، ترقیوں اور تبادلوں کو جدید ٹیکنالوجی سے ہم آہنگ کرکے شفاف بنایا جائے گا۔
ایئر مارشل ارشد ملک نے کہا کہ اگرچہ ائر لائن معاشی اور انتظامی مشکلات سے گزر رہی ہے مگر وہ پر امید ہیں کہ ان کو دور کرنے میں اللہ تعالیٰ کی مدد شامل رہے گی۔
