چیئرمین پی ٹی آئی کے وکیل نعیم حیدر پنجوتھا نے کہا ہے کہ سائفر کیس کا فائل ریکارڈ دیکھا ہے جج نے اپنے آرڈر میں لکھا کہ چیئرمین پی ٹی آئی کی جان کو خطرہ ہے۔
اے آر وائی نیوز کے مطابق چیئرمین پاکستان تحریک انصاف اور سابق وزیراعظم کے وکیل نعیم حیدر پنجوتھا نے سماجی رابطوں کی ویب سائٹ ٹوئٹر پر اپنے ٹویٹ میں کہا ہے کہ سائفر کیس کا فائل ریکارڈ دیکھا ہے اس میں جج نے آرڈر میں لکھا ہے کہ چیئرمین پی ٹی آئی کی جان کو خطرہ ہے۔
نعیم حیدر پنجوتھا ایڈووکیٹ نے اپنے ٹویٹ میں مزید لکھا کہ 15 اگست کو ایف آئی اے نے جج سے چیئرمین پی ٹی آئی سے جیل میں تفتیش کرنے کے حوالے سے اجازت لی اور 16 تاریخ کو جج سے جسمانی ریمانڈ مانگا گیا جج نے اپنے آرڈر میں لکھا چیئرمین پی ٹی آئی کو پیش کیے بغیر جوڈیشل ریمانڈ دیا جاتا ہے۔
انہوں نے کہا کہ ہم تو پہلے ہی چلا چلا کر کہہ رہے تھے کہ چیئرمین پی ٹی آئی کی جان کو خطرہ ہے، ان پر قاتلانہ حملے ہو چکے ہیں، ہم نے جان کے خطرے کا کہا تو پیش نہ ہونے پر وارنٹ نکالے گئے اور انہیں پیش ہونے پر مجبور کیا جس پر وہ عدالتوں میں پیش بھی ہوئے۔
آج سائفر کیس کی فائل ریکارڈ دیکھنے پر پتا چلا ہے کہ 15 تاریخ کو ایف آئی اے نے جج صاحب سے عمران خان سے جیل میں تفتیش کرنے کے حوالے سے اجازت لی اور 16 تاریخ کو جج صاحب سے جسمانی ریمانڈ مانگا گیا لیکن جج صاحب نے جوڈیشل کر دیا ،قانونی طور پر جب جسمانی ریمانڈ مانگا جاتا ہے تو ملزم کی…
— Naeem Haider Panjutha (@NaeemPanjuthaa) August 31, 2023
نعیم حیدر نے کہا کہ ہم نے پوچھا کوئی گرفتاری یا ریمانڈ مانگا گیا ہے تو عدالت نے تسلیم نہیں کیا، چیئرمین پی ٹی آئی یا ہمیں نہ تو گرفتاری کا پتہ اور نہ ہی ریمانڈ کا علم تھا۔ چیئرمین پی ٹی آئی کو عدالت میں بھی پیش نہیں کیا گیا۔ ریمانڈ کا انہیں 30 تاریخ کو دوران سماعت جیل میں پتہ چلا۔
