اسلام آباد : توشہ خانہ کیس میں چیئرمین پی ٹی آئی کے ضمانتی مچلکے جمع کرانے کے بعد ہائی کورٹ کے رجسٹرار آفس نے چیئرمین پی ٹی آئی کی رہائی کا روبکار جاری کردیا۔
تفصیلات کے مطابق چیئرمین پی ٹی آئی کی جانب سے ایک لاکھ روپے کے مچلکے آج جمع کرائے گئے، مچلکے جمع ہونے کے بعد ہائیکورٹ رجسٹرار کے دفتر نے روبکار جاری کیا۔
یاد رہے کہ گزشتہ روز توشہ خانہ کیس میں چیئرمین پی ٹی آئی کی سزا معطل ہوئی تھی، اسلام آباد ہائی کورٹ نے چیئرمین پی ٹی آئی کو ضمانت پر رہا کرنے کا حکم جاری کیا تھا۔
ہائی کورٹ کا عملہ روبکار لے کر اٹک جیل روانہ ہوگیا، روبکار کی کاپی سیشن جج ویسٹ اور اسلام آباد کے تحصیل دار کو بھی ارسال کردی گئی ہے۔
توشہ خانہ کیس : چیئرمین پی ٹی آئی کی رہائی کا تحریری فیصلہ
اسلام آباد ہائی کورٹ نے چیئرمین پاکستان تحریک انصاف (پی ٹی آئی) کی توشہ خانہ فوجداری کیس میں سزا معطلی کا 8 صفحات پر مشتمل تحریری فیصلہ جاری کردیا۔
چیف جسٹس اسلام آباد ہائی کورٹ عامر فاروق اور جسٹس طارق محمود پر مشتمل بینچ کی جانب سے گزشتہ روز محفوظ کیے گئے فیصلے میں کہا گیا کہ ٹرائل کورٹ کی جانب سے 3 سال قید اور ایک لاکھ روپے جرمانے کی سزا معطل کی جاتی ہے۔
