کراچی : اتحادی جماعت ایم کیو ایم نے چئیرمین اور ڈپٹی چئیرمین کے حکومتی امیدوار کو جتوانے کے لیے سینیٹ میں اپنے ووٹ پورے کرلیے۔
تفصیلات کے مطابق چئیرمین اور ڈپٹی چئیرمین کے حکومتی امیدوار کو جتوانے کے معاملے پر حکومت کے اتحادی ایم کیو ایم نے سینیٹ میں اپنے ووٹ پورے کرلیے۔
ایم کیو ایم ذرائع کا کہنا ہے کہ عدت میں بیٹھی ایم کیو ایم کی خواتین کی مخصوص نشست پر منتخب سینیٹر خالدہ اطیب نے شرعی تقاضے پورے کرلیے ، نو منتخب سینیٹر تمام شرعی تقاضے پورے کرتے ہوئے اسلام آباد جائیں گی۔
ذرائع کے مطابق خالدہ اطیب حلف بھی لیں گی اور پارٹی پالیسی کے تحت ووٹ بھی کاسٹ کریں گی۔
یاد رہے گذشتہ روز ایم کیو ایم پاکستان کے کنویئر خالد مقبول صدیقی کی ہدایت پر کشور زہرہ نے خالدہ اطیب سے رابطہ کیا تھا اور کہاتھا کہ عدت ختم کرنے کے لیے فتوی لے سکتی ہیں۔
جس کے بعد خالدہ اطیب نے عدت میں ہونے کے باعث ووٹ ڈالنے کے لیے اسلام آباد جانے کے حوالے سے علماء کرام سے رجوع کیا تھا۔
خیال رہے چئیرمین اور ڈپٹی چئیرمین سینیٹ کا انتخاب کل ہوگا ، حکومتی اتحاد کے صادق سنجرانی اور اپوزیشن اتحاد کے یوسف رضا گیلانی کانٹے کا مقابلہ متوقع ہے۔
نمبر گیم میں اپوزیشن اکیاون ووٹ کے ساتھ آگے ہے، حکومتی اتحاد کے پاس اڑتالیس ووٹ ہیں، سو کے ایوان میں چیئرمین سینیٹ منتخب ہونے کے لیے اکیاون ووٹ درکار ہوں گے۔
