چکوال: مدرسے میں طلبا سے مبینہ زیادتی کیس میں پولیس تین دن بعد بھی مہتمم اور نائب مہتمم کو پکڑنےمیں ناکام ہے۔
تفصیلات کے مطابق چکوال کےمدرسے میں چودہ بچوں سےمبینہ زیادتی کے واقعے میں پولیس تین دن بعد بھی مہتمم اور نائب مہتمم کو پکڑنے میں ناکام رہی۔
دومرکزی ملزم قاری ذیشان اورانیس چکوال کی عدالت میں پیش کیا گیا ، جہاں ملزمان کا چار روزہ جسمانی ریمانڈ منظور کرلیا اور دونوں ملزمان کو تئیس نومبر کو جوڈیشل مجسٹریٹ کی عدالت میں دوبارہ پیش کرنے کا حکم بھی دیا۔
پولیس کا کہنا ہے کہ جنسی زیادتی کی تصدیق کے لیے ملزمان کے ڈی این اے سیمپل فرانزک لیبارٹری بھجوا دیے گئے ہیں، ملزمان نے نازیبا حرکات اور تشدد کا اقرار کیا ہے تاہم جنسی زیادتی کا الزام مستردکردیا ہے۔
دوسری جانب مدرسہ میں طلبا سےمبینہ زیادتی کیس میں ملزمان کیخلاف کارروائی خفیہ رکھنے کی کوشش کی جارہی ہے، عدالت میں پیشی پراعلیٰ افسران نے ملزمان کی ویڈیو نہ بنانے کی ہدایات جاری کیں ، جس کے بعد صحافیوں کو ملزمان کے قریب نہیں آنے دیا گیا اور نہ ویڈیو بنانے دی گئی۔
