پاکستان کے سابق کرکٹرز نے چیمپئنز ٹرافی اسکواڈ میں امام الحق کو شامل نہ کیے جانے پر شدید تنقید کرتے ہوئے کہا ہے کہ اوپنر کی سلیکشن 100 فیصد بنتی تھی۔
آئی سی سی چیمپئنز ٹرافی کا آغاز آج سے ہو رہا ہے۔ میگا ایونٹ کے لیے پاکستانی اسکواڈ اپنے اعلان کے بعد سے ہی متنازع اور موضوع بحث ہے۔ بالخصوص کچھ کھلاڑیوں کی سرپرائز انٹری اور صرف ایک اسپنر اور ایک اوپنر شامل کیے جانے پر سابق کرکٹرز اور تجزیہ کار سلیکشن پر سوالات اٹھا رہے ہیں۔
اے آر وائی نیوز کے اسپورٹس پروگرام میں اسی حوالے سے گفتگو کرتے ہوئے سابق قومی کرکٹر باسط علی نے کہا کہ یہ پاکستان کی ٹیم ہے، کسی فرد واحد کی نہیں۔ اگر امام الحق اچھا کھیل رہا ہے تو اسے لینا چاہیے تھا۔ ڈومیسٹک میں اس نے جیسی کارکردگی دکھائی تو چیمپئنز ٹرافی اسکواڈ میں سلیکشن 100 فیصد بنتی تھی۔
انہوں نے کہا کہ 48 کی ایوریج سے رنز، 9 سنچریاں۔ آپ کیسے اس کو نظر انداز کر سکتے ہیں۔ اگر وہ 2023 کے ورلڈ کپ میں ناکام ہوا تو واپس ڈومیسٹک میں آکر پرفارم بھی کیا جب کہ ہمارے نام نہاد اسٹارز نے ڈومیسٹک کھیلی بھی نہیں۔
باسط علی نے مزید کہا کہ اگر بابر اعظم ناکام ہوا تو جواز پیش کر دے گا کہ اس نے تو اوپن کے لیے نہیں کہا تھا۔ اسے تو زبردستی اوپن کرایا گیا۔
سینئر اسپورٹس صحافی شاہد ہاشمی نے کہا کہ امام الحق کپتان اور سلیکشن ٹیم کی گڈ بک میں نہیں۔ کامران اکمل نے کہا کہ اگر وہ گڈ بک میں نہیں تو ڈومیسٹک میں اچھی کارکردگی دکھانے والے شرجیل خان یا شاہ میر کو لیا جا سکتا تھا۔
