کراچی: چیف میٹرولوجسٹ سردار سرفراز نے اربن فلڈنگ کی خبروں کی تردید کر دی۔
تفصیلات کے مطابق چیف میٹرولوجسٹ سردار سرفراز نے اے آر وائی نیوز سے گفتگو کرتے ہوئے کہا ہے کہ اربن فلڈنگ کا کوئی خطرہ نہیں ہے، سوشل میڈیا پر اس حوالے سے غلط خبریں پھیلائی جا رہی ہیں۔
سردار سرفراز نے بارش کے سسٹم کے حوالے سے بتایا کہ مغربی ہواؤں کا سلسلہ بلوچستان کے راستے سندھ میں داخل ہوگا، اس وقت ہوا کا کم دباؤ عمان کے آس پاس موجود ہے۔
چیف میٹرولوجسٹ نے کہا ’’بلوچستان کے جنوبی ڈسٹرکٹ میں گرج چمک کے ساتھ بارش ہوگی، اور بارشوں کا سلسلہ 28 اپریل سے 2 مئی تک جاری رہے گا۔‘‘
انھوں نے کہا کہ بارشوں کا یہ سلسلہ سندھ میں بھی داخل ہوگا، اور کراچی سمیت سندھ کے بیش تر اضلاع میں کہیں تیز اور کہیں درمیانی بارش ہوگی۔
چیف میٹرولوجسٹ سردار سرفراز نے کہا کہ ماہی گیروں کو سمندر میں جانے سے منع نہیں کیا گیا ہے۔
