لاہور: وزیر اعلیٰ پنجاب پرویز الہٰی کے اعتماد کے ووٹ کے معاملے پر رانا ثنا اللہ کا دھواں دار بیان سامنے آ گیا۔
تفصیلات کے مطابق وفاقی وزیر داخلہ رانا ثنا اللہ نے دھمکی دیتے ہوئے کہا ہے کہ اگر کل پرویز الہٰی نے اعتماد کا ووٹ نہ لیا تو گورنر وزیر اعلیٰ ہاؤس کو سیز کر دیں گے۔
انھوں نے کہا ہم سب آپس میں رابطے میں ہیں، پرویز الہٰی خود کہہ رہے ہیں کہ مجھ سمیت 90 فی صد ارکان اسمبلی توڑنے کے حق میں نہیں۔ رانا ثنا اللہ نے کہا کہ پرویز الہٰی کی دُہائیوں پر عدم اعتماد نہ لاتے تو کیا کرتے۔
وزیر داخلہ نے کہا اسپیکر پنجاب اسمبلی کا اجلاس نہ بلانے سے متعلق مؤقف غلط ہے، ان کی بات آئین کے خلاف ہے، گورنر اسمبلی کا اجلاس بلا سکتا ہے، اگر 4 بجے اجلاس نہ ہوا اور وزیر اعلیٰ نے اعتماد کا ووٹ نہ لیا تو گورنر وزیر اعلیٰ ہاوس سیل کر دیں گے، اجلاس نہ بھی ہو تو وزیر اعلیٰ کو اعتماد کا ووٹ لینا پڑے گا۔
رانا ثنا نے کہا کہ پرویز الہٰی کل اعتماد کا ووٹ نہیں لیتے تو پھر گورنر نئے وزیر اعلیٰ کے انتخاب کا اعلان کر سکتے ہیں۔
دوسری طرف اسپیکر پنجاب اسمبلی نے گورنر کا اعتماد کے ووٹ کے لیے اجلاس بلانا غیر قانونی قرار دے دیا ہے، اسپیکر پنجاب اسمبلی سبطین خان نے صحافیوں سے گفتگو میں کہا گورنر پنجاب نے اعتماد کا ووٹ مانگا میں اسے غیر قانونی سمجھتا ہوں، وہ اعتماد کے ووٹ کا نہیں کہہ سکتے۔
سبطین خان نے کہا پنجاب اسمبلی کا اجلاس ہم نے ختم نہیں کیا تھا بلکہ ملتوی کیا تھا، ہو سکتا ہے آج کا اجلاس ہم ملتوی کر دیں، گورنر نے پہلے بھی اجلاس ایوان اقبال میں بلایا تھا، شوق ہے تو دوبارہ بلا لیں لیکن وزیر اعلیٰ نہیں جائیں گے۔
صحافی نے سبطین خان سے سوال کیا کہ کیا آپ صورت حال سے گھبرائے ہوئے ہیں، تو اسپیکر نے جواب دیا کہ کیا میری شکل دیکھ کر لگتا ہے کہ گھبرایا ہوا ہوں۔
