سینیٹر فیصل واوڈا نے کہا ہے کہ وزیراعلیٰ کے پی کی حرکت شرمناک ہے، اقتدار کیلئے ملک کو سرعام بےعزت کرارہا ہے۔
تفصیلات کے مطابق سینیٹر فیصل واوڈا کا مزید کہنا تھا کہ پاکستان تحریک انصاف اپنے اقتدار کیلئے ملک توڑنے کے ڈگر پر ہے، شرمناک بات یہ ہے کہ حکومت نالائق اور نااہل کیساتھ نکمی اور بزدل بھی ہے۔
انھوں نے کہا کہ واقعے پر اب تک کوئی مذمتی بیان کوئی ایکشن کوئی ڈیمارش نہیں کیا گیا، سب سورہے ہیں کم ازکم حکومت ٹک ٹاک سمجھ کر ہی کچھ کرلے۔
خیال رہے کہ افغان قونصلیٹ کے عہدیداروں کی بدتہذیبی اس وقت انتہا کو پہنچ گئی جب سفارتی اصولوں کی سنگین خلاف ورزی کرتے ہوئے پاکستانی قومی ترانے کے دوران وہ بیٹھے رہے۔
افغان قونصلیٹ کے عہدیداروں کو آج رحمت العالمین کانفرنس میں پشاور میں دعوت دی گئی، وزیراعلیٰ کے پی علی امین گنڈاپور نے افغان قونصلیٹ کےعہدیداروں کو دعوت دی تھی، افغان قونصل جنرل محب اللہ شاکر پاکستان کے قومی ترانے کے دوران بیٹھے رہے۔
افغان قونصل جنرل سفارتی پروٹوکول کی دھجیاں اڑاتے ہوئے ڈھٹائی، بےشرمی کے ساتھ بیٹھے رہے، قومی ترانے کا احترام نہ کرکے محب اللہ شاکر نے اعلان کیا ہے اسے پاکستان اور قوم کا احترام نہیں۔
افغان قونصل جنرل کا یہ طرزعمل غیرمعمولی واقعے کے طور پر دیکھا جارہا ہے جو کہ سفارتی آداب کے بالکل برخلاف ہے۔
