ایک عام انسان کے بال بچپن سے لے کر جوانی تک کسی رنگ کے بھی ہوں مگر عمر بڑھنے کے ساتھ وہ سفید ہونے لگتے ہیں، لیکن بعض اوقات بہت چھوٹی عمر میں ہی بال سفید ہونے لگتے ہیں۔
اس کی بہت سی وجوہات ہوتی ہیں، اس حوالے سے اے آر وائی نیوز کے پروگرام باخبر سویرا میں ڈرماٹولوجسٹ ڈاکٹر خرم بشیر نے بچوں کے بالوں میں سفیدی کی وجوہات اور اس کے علاج کے بارے میں ناظرین کو آگاہ کیا۔
انہوں نے بتایا کہ بال جلد میں موجود بالوں کے غدود سے نکلتے ہیں، جہاں بالوں کو سیاہ رکھنے والے خلیات موجود ہوتے ہیں، یہ خلیے باقاعدگی سے بنتے ہیں اور تباہ بھی ہوتے ہیں اور یہ خلیے اسٹیم سیل سے بنتے ہیں۔
ان کا کہنا تھا کہ بچوں کے بالوں میں سفیدی کی بڑی وجوہات میں ان کی نامکمل غذا، نیند پوری نہ لینا، سر میں تیل نہ لگانا اور کسی بھی غیر معیاری شیمپو سے بال دھونا شامل ہیں۔
انہوں نے کہا کہ اگر آپ چاہتے ہیں کہ آپ بال قدرتی طور پر نشونما حاصل کریں تو اس کیلئے ایسا تیل بنانے کی ترکیب بیان کررہا ہوں کہ جس سے بالوں کی شکایات کا ازالہ ممکن ہوسکے گا۔
اس طریقہ یہ ہے کہ ایک تہائی کیسٹر آئل، ایک تہائی زیتون کا تیل اور اتنا ہی ناریل کا تیل، اب ان تینوں تیلوں کو ملا کر کسی برتن میں ہلکا سا ابال لیں، اس کے اندر پانچ چیزیں شامل کریں۔ جس میں مٹھی بھر لونگ، ایک مٹھی میتھی دانہ، رتن جو ، ایک چمچہ سرمہ ایک بیٹا جینک نامی کریم دس سے 15 گرام شامل کریں۔
ان تمام چیزوں کو تیل میں ابالنے کے بعد تھنڈا کرکے 24 گھنٹے کیلئے دھوپ میں رکھ دیں، اور پھر اس کی مالش کریں کچھ دنوں میں ہی اس کا بہترین رزلٹ آپ کے سامنے ہوگا۔
