بیجنگ: چین نے جوابی اقدام کرتے ہوئے جاپانی شہریوں کو ویزے جاری کرنے پر پابندی عائد کر دی۔
تفصیلات کے مطابق چین نے ٹوکیو کی جانب سے چینی مسافروں کے لیے پی سی آر منفی ٹیسٹ رپورٹ کی پابندی ’امتیازی‘ قرار دیتے ہوئے جاپانی شہریوں کو بھی عام ویزا جاری کرنا بند کر دیا۔
جاپان میں واقع چین کے سفارت خانے نے اطلاع دی کہ جاپان میں موجود سفارت خانے اور قونصل خانے آج سے چین کا سفر کرنے والے جاپانی شہریوں کے لیے عام ویزا معطل کر رہے ہیں۔
واضح رہے کہ یہ فیصلہ جاپان کی جانب سے 30 دسمبر کو چین سے آنے والوں پر سخت قرنطینہ اقدامات کے اعلان کے بعد سامنے آیا ہے، ان اقدامات میں لازمی کووِڈ 19 ٹیسٹنگ، اور چین کے لیے پروازوں کے لیے جاپان میں ایئرپورٹس کی تعداد کو 4 تک محدود کرنا شامل ہیں۔
چین کی وزارت خارجہ کے ترجمان وانگ وین بن نے کہا تھا کہ چین ایسے اقدامات کو ’امتیازی‘ سمجھتا ہے اور بیجنگ جوابی کارروائی کرے گا۔
یاد رہے کہ اس سے قبل منگل کو چین نے بھی جنوبی کوریا کے شہریوں کو مختصر مدت کے ویزے جاری کرنے پر پابندی لگا دی تھی۔
