بیجنگ: چین میں کرپشن پر ہائی پروفائل کارپوریٹ سربراہ وانگ بن کو مہلت کے ساتھ سزائے موت دے دی گئی۔
چینی میڈیا رپورٹس کے مطابق کمیونسٹ پارٹی کے سابق سربراہ اور چائنا لائف انشورنس کے سابق چیئرمین وانگ بن کو تقریباً 325 ملین یوآن (44.5 ملین ڈالر) رشوت لینے اور تقریباً 56.4 ملین یوآن کے بیرون ملک ڈپازٹ چھپانے کے جرم میں منگل کو 2 سال کی مہلت کے ساتھ سزائے موت سنائی گئی۔
دو سالہ مہلت ختم ہونے کے بعد وانگ کی سزائے موت کو عمر قید میں تبدیل کر دیا جائے گا، شینڈونگ صوبے کی عدالت کے جاری کردہ فیصلے کے مطابق عمر قید کے دوران وانگ بن پیرول یا سزا میں کمی کے اہل نہیں ہوں گے۔
عدالت نے وانگ بن کو تاحیات سیاسی حقوق سے بھی محروم کر دیا ہے، اور ان کے تمام اثاثے بھی ضبط کر لیے گئے۔ عدالتی فیصلے میں یہ نہیں بتایا گیا ہے کہ آیا وانگ اس فیصلے کے خلاف اپیل کر سکتے ہیں یا نہیں۔
چینی صدر شی جن پنگ نے مالیاتی شعبے میں کرپشن کے خلاف جو کریک ڈاؤن شروع کیا ہے اس میں یہ پہلی ہائی پروفائل سزا ہے۔
