اسلام آباد : وفاقی وزیر توانائی خرم دستگیر کا کہنا ہے کہ چینی کمپنی پاکستان میں ساڑھے3 ارب کی سرمایہ کاری کرے گی، چینی سرمایہ کاری سےنیوکلیئر کے شعبے کو فروغ ملے گا۔
تفصیلات کے مطابق وفاقی وزیر توانائی خرم دستگیرخان نے گیپکو ہیڈ کوارٹر میں پریس کانفرنس کرتے ہوئے کہا کہ پاکستان کی نیوکلیر انرجی پر میاں نوازشریف اور میاں شہباز شریف کے گہرے نقوش ہیں۔
خرم دستگیر کا کہنا تھا کہ پاکستان کے نیوکلیر ٹیکنالوجی کے فروغ کے لیے کے ٹو اور کے تھری اہم سنگ میل ثابت ہوں گے اور چائنیز کمپنی اس پلانٹ پر ساڑھے تین ارب ڈالر کی سرمایہ کاری کرے گی۔
وفاقی وزیر توانائی نے کہا کہ چینی سرمایہ کاری سے نیوکلیئر کے شعبے کو فروغ ملے گا اور نوکلیئر بجلی تیل ،ڈیزل اور فرنس آئل کے مقابلے میں سستی بجلی ہوگی، ہمارے پاس اس وقت مہنگی بجلی بنانے والے ذرائع موجود ہیں لیکن ان کو استعمال کرنا صارفین کے بجلی کا بل بڑھانے کے مترادف ہیں۔
انھوں نے کہا کہ ہم نے غریب دشمن ،ترقی دشمن اور سی پیک دشمن حکومت کے اثرات کو ذائل کر دیا ہے اوراب پاکستان اور چین کے تعلقات اسی نہج کے قریب آچکے ہیں جہاں میاں محمد نواز شریف کے دور میں تھے۔
خرم دستگیر کا کہنا تھا کہ ہماری کوشش ہے کہ صارفین کو زیادہ سے زیادہ بجلی فراہم کی جائے اور فیول پرائس ایڈجسٹمنٹ سے بھی بچایا جائے اور لوڈشیڈنگ کی وجہ بھی یہی ہے کہ صارفین پر بجلی کے بلوں کا دباو کم سے کم رکھا جائے۔
وزیر توانائی نے مزید کہا کہ ہمارے دور حکومت میں پاکستان کی بجلی میں پانچ ہزار میگاواٹ کا اضافہ کیا گیا ہے 1100میگاواٹ کے تھری جبکہ دو ہزار میگاواٹ تھر سے نیشنل گرڈ میں شامل کیے گئے ہیں۔
