The news is by your side.

Advertisement

چین : بچوں پر تشدد کے لئے پرکار کا استعمال کرنے والا ٹیچر گرفتار

بیجنگ : چینی پولیس نے طلباء پر انتہائی اذیت ناک تشدد کے الزام میں ایک اسکول ٹیچر کو گرفتار کیا ہے، ہوم ورک نہ کرنے کے جرم میں استاد نے پرکار کی نوک ان کے جسم میں پیوست کردی تھی۔

تفصیلات کے مطابق چین میں اسکول کا ٹیچر جلاد بن گیا، پولیس نے درجنوں طلباء کو اذیت ناک تشدد کا نشانہ بنا کر زخمی کرنے کے جرم میں گرفتار کرکے مقدمہ درج کرلیا۔

اس حوالے سے پولیس کا کہنا ہے کہ اسکول ٹیچر مسٹر سو نے مبینہ طور پر اپنی کلاس میں کم از کم 40 طلبا کو دھاتی پرکار کا استعمال کرتے ہوئے سزا دی اور اس پرکار کی نوک ان کے بازوؤں میں پوری طاقت سے چبھوئی کہ خون نکل آیا۔

غیر ملکی خبر رساں ادارے کے مطابق طلبا ء کا جرم اتنا تھا کہ انہوں نے ہوم ورک نہیں کیا تھا،اس واقعے کی ویڈیو سوشل میڈیا پر وائرل ہونے کے بعد پولیس نے ٹیچر کیخلاف کارروائی کی۔

ویڈیو میں ایک طالب علم متاثرہ جگہ کی نشاندہی کرکے اپنی چوٹیں دکھا رہا ہے، پولیس کے مطابق ملزم مسٹر سو اب قانون کی گرفت میں ہے اور اس سے مزید تحقیقات کی جارہی ہیں۔

مزید پڑھیں : موڈ خراب ہونے پر ٹیچر کا ننھے بچوں سے انسانیت سوز سلوک

واضح رہے کہ اس سے قبل بھی چین کے ایک کنڈر گارڈن میں پولیس نے ایک ٹیچر کو ننھے بچے کو بالوں سے پکڑ کر جگانے اور زمین پر پٹخنے کے کے جرم میں گرفتار کیا تھا۔

ٹیچر کی بے رحمی اس وقت سامنے آئی جب ماں نے بچے کے سر اور جسم پر زخموں کے نشانات دیکھے اور کنڈر گارڈن کی انتطامیہ سے اس کی شکایت کی۔ ماں نے ان سے سی سی ٹی وی فوٹیج دکھانے کا مطالبہ بھی کیا۔

Comments

یہ بھی پڑھیں