چترال نے گلگت کی ٹیم کو شکت دے کر شندور پولو فیسٹول 2023 بھی اپنے نام کر لیا۔
چترال کی ٹیم نے گلگت بلتستان کو 5 گول کے مقابلے میں 7 گول سے شکست دے کر مسلسل ساتویں بار فائنل کی فاتح ٹیم کا اعزاز اپنے نام کر لیا ہے۔
دنیا کے، سب سے بلندی پر واقع کھیل کے میدان شندور کے پولو گراؤنڈ میں کھیلے گئے پولو فیسٹول میں ملکی و غیر ملکی سیاحوں نے کثیر تعداد میں شرکت کی، سیاح شندور کے پولو گراؤنڈ میں کھیل کے ساتھ وادئ شندور کے خوب صورت نظاروں سے بھی محظوظ ہوئے۔
تین روزہ پولو فیسٹول کا فائنل چترال کی ٹیم نے اپنے نام کیا تو چترال کے باسی خوشی سے جھوم اٹھے، کیلاشی رقص سمیت مختلف بینڈز نے اپنے فن کا مظاہرہ کیا اور پیرا گلائیڈنگ کا بھی شان دار مظاہرہ کیا گیا۔
چترال مسلسل ساتویں بار فاتح قرار
چترال کی پولو ٹیم نے اس بار بھی جیت کی روایت برقرار رکھی اور ٹرافی اپنے نام کی، چترال ٹیم 2015 سے شندور پولو فیسٹول کا تاج اپنے سر سجاتے آ رہی ہے۔
2015، 2016، 2017، 2018 اور 2019 میں چترال کی ٹیم نے مسلسل کامیابی سمیٹی، 2020 میں دنیا بھر میں کرونا وبا کی وجہ سے معمولات زندگی متاثر ہوئے تو 2020 اور 2012 میں شندور پولو فیسٹول کا انعقاد بھی ممکن نہیں ہو سکا، یوں دو سال وقفے کے بعد 2022 میں شندور فیسٹول کا انعقاد کیا گیا۔
گلگت کی ٹیم دو سال وقفے کے بعد پرامید تھی کہ وہ چترال کی فتح کے تسلسل کو توڑنے میں کامیاب ہوگی، لیکن 2022 میں بھی دل چسپ مقابلے کے بعد چترال پھر بازی لے گیا اور فاتح قرار پائی، اور اب 2023 کا فائنل جیت کر مسلسل ساتویں بار ٹائنل کا دفاع کیا۔
