پاکستان مسلم لیگ ق کے سربراہ چوہدری شجاعت حسین کا کہنا ہے کہ انہیں ملک میں عام انتخابات وقت پر ہوتے نظر نہیں آ رہے ہیں۔
مسلم لیگ ق کے صدر اور سابق وزیراعظم چوہدری شجاعت حسین نے اے آر وائی نیوز سے خصوصی گفتگو کرتے ہوئے کہا ہے کہ انہیں ملک میں عام انتخابات اپنے وقت پر ہوتے دکھائی نہیں دے رہے ہیں جب کہ ابھی تو انتخابات کا سوال ہی پیدا نہیں ہوتا۔
سینیئر سیاستدان نے مشورہ دیا کہ تمام جماعتیں معاشی بحالی کے ون پوائنٹ ایجنڈے پر مل بیٹھ کر فیصلے کریں اور معاشی بحالی کی مشترکہ کانفرنس کی سربراہی چیف جسٹس آف پاکستان کریں۔
چوہدری شجاعت نے کہا کہ پرویز الٰہی اورمونس الہٰی کو ق لیگ سےنکالنے کا ارادہ نہیں۔ شوکاز نوٹسز صرف ان کےغلط اقدام کو روکنے کے لیے دییے ہیں۔ میں چاہتا ہوں کہ پرویزالہی مسلم لیگ ق ہی میں رہیں۔
ان کا کہنا تھا کہ پرویز الٰہی سے سارا معاملہ ایم پی ایز کو خط لکھنے سے خراب ہوا۔ مجھے پرویز الہٰی نے بہت کہا کہ خط واپس لےلیں لیکن میں نے کہا یہ ناممکن ہے۔
چوہدری شجاعت نے کہا کہ یہ بات اس حد تک پہنچ گئی کہ گھر کے اندر تقسیم کے لیے ایک دیوار بنالی جائے، میں نے کہا ایسی دیوار تو نہیں بننے دوں گا۔ دیوار بنانے کا مقصد عمران خان کو یقین دلانا تھا کہ ہم علیحدہ ہیں۔
