اسلام آباد: سگریٹ نوشی کرنے والے افراد کے لیے بری خبر ہے، آئندہ وفاقی بجٹ میں سگریٹ مزید مہنگے ہونے کا امکان ہے۔
ذرائع وزارت صحت کے مطابق سگریٹ کی قیمتوں میں اضافے سے متعلق سفارشات مرتب ہو رہی ہیں، جب کہ این جی اوز کی جانب سے سگریٹ پر ٹیکسز سے متعلق مرتب شدہ سفارشات وزارت صحت کو مل چکی ہیں۔
این جی اوز نے سگریٹ پر عائد فیڈرل ایکسائز ڈیوٹی بڑھانے کا مطالبہ کیا ہے اور کہا ہے کہ سگریٹ ایف ای ڈی میں 26.6 فی صد اضافہ کیا جائے۔ وزارت صحت این جی اوز اور ٹی سی سی کی سفارشات پر غور کر رہی ہے، ٹوبیکو کنٹرول سیل نے اس پر اپنی سفارشات تیار کر لی ہیں۔
ذرائع کا کہنا ہے کہ وزارت صحت سگریٹ قیمتوں سے متعلق سفارشات کو رواں ہفتے حتمی شکل دے کر وزارت خزانہ کو بھجوا دے گی، سگریٹ پیکٹ پر ایف ای ڈی میں 15 سے 19 فی صد تک اضافے کا امکان ہے، حکومت نے سگریٹ پیکٹ کی کم سے کم قیمت 127 روپے مقرر کی ہے، جب کہ حکومت ایک سگریٹ پیکٹ پر 120 روپے 44 پیسے ٹیکسز لے رہی ہے۔
ملک میں لوکل انڈسٹری کا سگریٹ پیکٹ 90 روپے میں فروخت ہو رہا ہے، ملٹی نیشنل سگریٹ ساز کمپنیوں نے گزشتہ سال 173 ارب ٹیکس دیا تھا، جب کہ لوکل سگریٹ ساز کمپنیوں نے گزشتہ سال 240 ارب ٹیکس چوری کیا تھا۔
ذرائع کے مطابق ایکسائز ڈیوٹی بڑھنے سے غیر قانونی سگریٹ کی فروخت میں بھی اضافے کا امکان ہے۔
View this post on Instagram
