اسلام آباد: سائفر کیس میں شاہ محمود قریشی کا ایک روزہ جسمانی ریمانڈ منظور ہو گیا۔
تفصیلات کے مطابق ڈیوٹی مجسٹریٹ نے سائفر کیس میں گرفتار پی ٹی آئی رہنما اور سابق وزیر خارجہ پاکستان شاہ محمود قریشی کا ایک روزہ جسمانی ریمانڈ منظور کر لیا۔
ایف آئی اے نے شاہ محمود قریشی کے 14 روزہ جسمانی ریمانڈ کی استدعا کی تھی۔
جوڈیشل مجسٹریٹ احتشام عالم نے ایک روزہ جسمانی ریمانڈ منظور ہونے کا تحریری فیصلہ جاری کر دیا ہے، جس میں کہا گیا ہے کہ ملزم پر آفیشل سیکرٹ ایکٹ اور تعزیرات پاکستان کی دفعہ 34 کے تحت مقدمہ درج ہے، قانون کے مطابق جسمانی ریمانڈ دینے کا اختیار خصوصی عدالت کو ہے، اور سرکاری چھٹی ہونے کے باعث ملزم کو ڈیوٹی عدالت میں پیش کیا گیا ہے، بطور ڈیوٹی جج ملزم کا ایک روزہ جسمانی ریمانڈ منظور کیا جاتا ہے۔
فیصلے میں کہا گیا کہ تفتیشی افسر ملزم کا میڈیکل کروائیں، اور 21 اگست کو ملزم کو خصوصی عدالت میں پیش کریں، تفتیشی افسر ملزم کے جسمانی ریمانڈ سے متعلق استدعا خصوصی عدالت کے سامنے رکھیں۔
واضح رہے کہ گزشتہ روز شاہ محمود قریشی جب پریس کانفرنس کر کے گھر پہنچے تو اسلام آباد میں ان کی رہائش گاہ سے انھیں گرفتار کیا گیا اور انھیں ایف آئی اے ہیڈ کوارٹر منتقل کیا گیا۔
پی ٹی آئی رہنما شاہ محمود قریشی کو گرفتار کرلیا گیا
شاہ محمود قریشی نے پریس کانفرنس میں 90 دن میں انتخابات اور مردم شماری سے متعلق مشترکہ مفادات کونسل (سی سی آئی) کے فیصلوں کو سپریم کورٹ میں چیلنج کرنے کا اعلان کیا تھا۔
