اسلام آباد : پاکستان تحریک انصاف کے رہنما شاہ محمود قریشی نے سائفر کیس میں سزا کے خلاف اسلام آباد ہائی کورٹ سے رجوع کرلیا، اپیل میں 30 جنوری کے سزا کے حکم کو کالعدم قرار دینے کی استدعا کی ہے۔
تفصیلات کے مطابق سائفر کیس میں پی ٹی آئی رہنما شاہ محمود قریشی نے سزا کے فیصلے کے خلاف اسلام آبادہائی کورٹ میں درخواست دائر کردی۔
شاہ محمود قریشی نے 10سال سزا کے ٹرائل کورٹ کےفیصلے کے خلاف اپیل دائر کی ، آفیشل سیکرٹ ایکٹ عدالت نےشاہ محمود قریشی کو 10سال قید کی سزا سنائی تھی۔
اپیل میں30 جنوری کے سزا کے حکم کو کالعدم قرار دینے کی استدعا کرتے ہوئے کہا ہے کہسائفر کیس کا ٹرائل قانونی طریقہ کار کے مطابق نہیں چلایا گیا ، 15 اگست سے شروع ٹرائل میں پراسس کی خلاف ورزی کی گئی۔
استغاثہ کے 10 گواہوں کے بیان میرے وکلا کی غیر موجودگی میں ریکارڈہوئے،مجھے نوٹس دیے بغیر میری طرف سے خودساختہ سرکاری وکیل مقرر کردیا۔
آرٹیکل10اےکےتحت بنیادی حقوق سے متعلق متعدد بار عدالت کو درخواست دی، 30جنوری کا ٹرائل کورٹ کا فیصلہ شفاف ٹرائل کے بنیادی اصولوں کے خلاف ہے۔
