اسلام آباد : سپریم کورٹ میں تین نئے ججوں نے حلف اٹھا لیا، حلف لینے والوں میں جسٹس اطہرمن اللہ، جسٹس حسن اظہر رضوی، اور جسٹس شاہد وحید شامل ہیں۔
تفصیلات کے مطابق سپریم کورٹ میں حلف برداری کی تقریب ہوئی، جس میں چیف جسٹس پاکستان جسٹس عمرعطا بندیال نے جسٹس اطہرمن اللہ، جسٹس حسن اظہر رضوی، جسٹس شاہد وحید سے حلف لیا۔
تقریب حلف برداری میں جج صاحبان، ایڈیشنل اٹارنی جنرل اور وکلاء سمیت لاء افسران اورعدالتی عملے نے بھی شرکت کی۔
اس حلف برداری کے بعد سپریم کورٹ کے ججوں کی تعداد پندرہ ہوگئی۔
یاد رہے 9 نومبر کو صدر مملکت عارف علوی نے چیف جسٹس اسلام آباد ہائی کورٹ اطہر من اللہ، جسٹس شاہد وحید اور جسٹس سید اظہر رضوی کو سپریم کورٹ میں ترقی دینے کی منظوری دی تھی۔
خیال رہے 4 نومبر کو ججوں کی تقرری کے لیے پارلیمانی کمیٹی نے اپنے ہنگامی اجلاس میں اسلام آباد ہائی کورٹ کے چیف جسٹس اطہر من اللہ کو سپریم کورٹ میں تعینات کرنے کے لیے جوڈیشل کمیشن آف پاکستان کی سفارش کی منظوری دی تھی۔
